"Batang Hari" nakadaog sa 14th Huniño

CEBU, Philippines — Laing hugna sa kalihokan sa  Basilica Minore del Sto. Niño de Cebu ang nahitabo niadtong Miyerkules  sa gabii nga naghatag  og luna sa composers nga mapadungog ang  ilang gimugna nga mga awit nga gihalad alang sa Batang Hesus.

Gipahigayon sa pilgrim center sa maong simbahan ang  ika-14 nga edisyon sa HuNiño: Huni Halad Alang Kang Señor Santo Niño nga nagpadayag sa dakong gugma sa Balaang Bata.

Napili  isip Grand Champion si Irineo C. Hernandez III pinaagi sa iyang mabulukong pagpasundayag sa kantang “Batang Hari" (Aming Señor Santo Niño)”. Gipasigarbo niya ang iyang kaugalingon isip kompositor, lyricist, musical arranger, ug interpreter sa maong awit.

Nakaangkon sa ikaduhang ganti ang  makapadasig nga awit nga “Santo Niño, Himayaon Ka” nga tinagik  ni Katrina Bacalso.

Samtang, nahimutang sa  ikatulong puwesto  mao ang emosyonal nga awit nga “Until I Found You” nga gimugna ni Jundel Bacalso.

Alang sa special  awards , napili nga Best in Lyric Video mao ang " Until I Found You", samtang ang  Best Interpreter Award kay naangkon sa mga nag-awit   sa " Santo Niño, Himayaon Ka". Nagsilbing event manager sa maong  kalihokan mao ang  SOUNDTRAXX Production Studio nga gidumala nila  ni Gloria ug Gani Villarojo.