Nagpaugat ang ex-GF

Dear Tito Miguel,

Ako diay si Bryle, 18 anyos ug taga Dakbayan sa Sugbo. Naproblema  ko sa akong ex- girlfriend nga si Claire kay dili gyud niya iuli akong mga gamit sa iyang kuwarto .  Sa wala pa mi nagbuwag , adto man gud ko matulog usahay sa ilaha,maong duna ko'y mga butang nga naa ra nako gibilin sa iyang kuwarto. Nagkauyab mi niadtong June 2024 , ug nagbulag niadtong February 2025.  Dili siya gustong iuli akong mga butang kay ganahan siya magbalik mi . Sa higayon nga magbalik mi, makabalik na daw ko sa iyang kuwarto ug didto na nako makuha ang akong mga gamit nga sama sa tab, laptop , piano ug uban pa. Unsaon mani nako Tito Miguel ? Dili ko ganahan nga magbalik mi. Nagbinuang  man gud siya sa among relasyon kaniadto maong nagbuwag mi. —Bryle

* *  *

Bryle,

Mora ka niya’g gi-blackmail. Kun dili ka makig-uli niya, dili sab nimo makuha imong mga butang. Puede ra unta pasagdan na lang, ihatag na lang niya tanan labi na’g barato ra, isip handumanan. Apan ka’y mahalon man, masabtan nga gisayangan ka.

Kun naglaom siya nga magbalik mo, tingali tungod kay dili pa hingpit ang pagbalibad nimo. Klarohi kausa pa, nga wala na siya’y mapaabot kanimo. Busa kuhaon na nimo imong mga butang nga naa sa iyang kuwarto. Ingna gipangita na sa imong ginikanan o igsoon ba kaha, kay dili ra ikaw ang tag-iya, kun dili hasta imong pamilya.

Kun mobalibad gihapon, pagpatabang sa iyang suod nga higala, nga siya tambagan nga wala siya!'y katungod sa imong mga butang. Kun dili madala, sa iyang igsoon o ginikanan ba kaha, kun kamo nag-ila. Posible mauwaw siya, ihatag na niya.

Apan kun dili gihapon, ikaw na mismo moingon niya nga mokonsulta na ka’g abugado unsaon pagkuha sa imong mga butang. Sa maong paagi siya maalarma. Apan kinahanglan andam ka sa iyang reaksyon ug posibleng buhaton. Sigurado siya nga ma-insulto. Kay matandog na man iyang garbo, lagmit mo-ingon pa kuhaa na karon dayon, wala siya mahangol sa imong mga butang. Kun dili gihapon, tinud-a. Ingna ipa-blotter na nimo sa pulis hangtod moabot mo sa barangay o korte kun siya magdumili. —Tito Miguel

Magpatambag ka? Ipada kang Tito Miguel: 0991-318-9366