Nagmatngon na

Gipili na gyud og maayo ni Krista Miller ang iyang mga higala karon, human siya nabilanggo niadtong 2016 gumikan sa gidiling droga. Sa exclusive interview sa PEP niya atol sa grand launching sa AQ Prime Stream adtong Sabado, niingon si Krista nga pamilya ug career na lang gyud ang iyang priority karon ilabi na nga single mother siya sa duha ka mga bata.

Aduna siyay mga higala, apan gipili na niya og maayo, dili na matud pa siya magpataka og salig kay maabusaran lamang siya. Sunod-sunod ang sexy films ni Krista alang sa nahisgutang streaming app. Nahuman na niya ang Bingwit ug Upuan nga labihan ka mapangahason, diin nisugot na siya nga mag-frontal. Himuon sab niya ang Amazona alang gihapon sa AQ Prime, ug may mga nakalinya pa siya nga sexy films. Todo kayud si Krista gumikan sa iyang mga anak. Gani, niadtong gitiwas niya ang iyang pagtuon, (gradwado na siya og Communication Arts), nag-call center agent siya ug nag-online teacher.  Kini kay dili matud pa niya makaya ang mag-showbiz ug mag-eskuyla pud.