Goodbye showbiz na

CEBU, Philippines — Hingpit na nga nanamilit sa showbiz ang kanhi PBB housemate ug sugboanon nga si Dionne Monsanto. Gipahibawo kini niya sa ABS-CBN morning show Magandang Buhay, kagahapon. Mao na kadto ang katapusan niyang paglugwa sa telebisyon.

Usa ka bulan na nga nagbase sa Switzerland si Dionne kauban ang iyang pamanhunon nga Fil-Swiss businessman nga si Ryan Stalder.

Nitatak ang ngalan ni Dionne sa telebisyon isip ang kontrabida nga si Lucy sa ABS-CBN drama "Tubig at Langis".

Lovi, Under...

Hingpit na nga gibutyag ni Lovi Poe ang rason nganong didto siya sa Amerika bag-ohay lang. Nag-record matud pa siya og kanta didto sa New York, diin ang producer mao ang Grammy award winner nga si Omen. Giulohan og "Under", madungog na matud ang maong awit karong adlawa.

New Project

Tua sa Sorsogon si John Lloyd Cruz alang sa shooting sa wala pa niya gidetalye nga project. Si Lloydie mismo maoy nag-upload sa facebook og mga hulagway niya nga kuha sa shooting kagahapon.

Tangtang hinuon!

Managsama nga gitangtang sa noontime show sa Net 25 nga Happy Time sila si Kitkat ug Janno Gibbs. Una niini, nag-isig padungog-dungog sila sa social media kabahin sa wala nila pagsinabtanay. Ang akusasyon mao nga gitulisok ni Janno ug gisultihan og mga sakit nga pulong si Kitkat sa taping nila sa maong show. Apan niklaro si Janno sa iyang official statement nga nagtuo siya nga lakip pa to sa ilang adlibs sa maong show aron ma alegre sila ug wala siya nagdahom nga gi-personal diay ni Kitkat.

Pagka hugyaw!

Giregalohan og tableware set ni Coco Martin ang iyang leading lady sa pelikulang "Love or Money" nga si Angelica Panganiban. Gucci ang brand niini hinungdan nga nikomedya si Angelica nga basin naay pangayuong bawos si Coco, dili matud pa pwede karon. Bugtong nakita nga tipik sa set ang usa ka plato nga cat print nga matud pa P15, 000 ang buok.

Snatcher, snatcher...

Diriyot matud pa malabni ang cellphone ni Sofia Andres sa EDSA niadtong Miyerkoles gabii. Abli man gud matud pa ang pultahan sa ilang sakyanan dihang kalit nga may nisuway og labni sa iyang cellphone-- maayo gani kay nakabantay siya niini. Pero labihan niyang hadloka.

Naning gyud si Bea

Gidayeg sa scriptwriter nga si Mel del Rosario si Bea Alonzo kay sa ilang meeting, nagbitbit gyud og notebook ang aktres ug gisuwat ang tanang detalye kabahin sa iyang character sa Pinoy adaptation sa Korean movie “A Moment To Remember.” Nagpatabang si Bea unsaon niya ang iyang character nga asawa nga gitakboyan og Alzheimer’s disease. March 14, magsugod ang lock in shooting nila ni Bea ug Alden Richards niining maong pelikula. Suma pa ni del Rosario, wala pa sila nag-meeting ni Alden, apan gidayeg matud pa og maayo sa actor ang role ug wala kini pamahayag kabahin sa kausaban nga himuon aron mohaom sa Pinoy audience. Si Nuel Naval maoy director. Si Mel ug Nuel ang tandem luyo sa malampuson nga Pinoy adaptation sa Korean movie, “Miracle in Cell No. 7”.

Two seasons ang sigurado

Karong March 2020 na mulugwa ang game show nga 1000 Heartbeats sa TV5 diin host niini si Xian Lim ug si Bobit Vidanes kinsa kanhi director sa It’s Showtime maoy director. Franchise show ang 1000 Heartbeats diin ang original show niini nagsugod didto sa United Kingdom. Suma pa two seasons dayon ang kinahanglan nilang humanon hinungdan nga gikalipay kini sa production crew sanglit aduna silay trabaho taliwala niining pandemya.

Nibiya sa Star Magic

Freelance artist na karon si Janus del Prado human siya nanamilit sa Star Magic human usab sa 21 ka mga tuig. Kinse anyos siya sa dihang nalakip siya sa Star Circle Batch 9.  Lakip sa iyang ka batch mao sila si Angel Locsin, Heart Evangelista ug Rafael Rosell. Nagpasalamat siya sa Star Magic ug niya pa, bisan tuod og mahuman na iyang kontrata sunod bulan, magpabilin ang iyang gugma ug suporta sa maong talent arm sa ABS-CBN.

Mahuman na

Mahuman na ang top-trending drama series sa ABS-CBN nga Ang Sa Iyo Ay Akin  karong March 19, 2021. Gisugdan kini niadtong August 2020, ug gibituonan nila ni Jodi Sta. Maria ug Iza Calzado kauban usab si Sam Milby. Sukad pagsugod nagkataas gyud ang views sa maong drama sa nagkadaiyang media platforms sa ABS-CBN diin kanunay sab kini nga gipakpakan online. 

TMP Reports

Mobalik sa telebisyon ang beteranang broadcaster nga si Tina Monson Palma pinaagi sa iyang TMP Reports sa ANC sugod karong umaabot March 29, 2021, nga iya sab nga birthday. Niretiro na si Monson sa maong cable channel sa ABS-CBN isip anchor sa The World Tonight, diin si Karen Davila ang nihulip niya.