Aiko nagpatabang sa CIDG

CEBU, Philippines — Gitinoud gyud ni Aiko Melendez ang basher sa iyang anak nga si  Andre  ug pormal na niya kini nga gireklamo sa autoridad.

Nasayran nga bastos kaayo ang maong netizen nga maoy nipakatap sa tsismis nga dunay video scandal si Andre.

Nidangop  sila si Aiko, Andre, ug ang uyab sa aktres nga si  Zambales Vice Governor Jay Khonghun sa buhatan sa  cybercrime division sa  Criminal Investigation and Detection Group (CIDG) sa Camp Crame, Quezon  City.

“Maraming Salamat po PLTCOL NICOMEDES P OLAIVAR JR PNP-ACG.. CYBERCRIME And Gen Agustin sa agaran Action!”,” suma pa sa post ni Aiko.

Nailhan na usab nila ang maong netizen .

“We now have a lead of who this crazy pervert, who caused my son Andre Yllana anxiety!”, suma pa sa aktres.

Ruru nanalipod kang Bianca

Wala kaagwanta si Ruru Madrid ug natubag gyud niya ang namalikas sa iyang girlfriend nga si  Bianca Umali.

Ang maong basher nilenggua nga ngil-ad og batasan si Bianca ug mao kini ang nag-una una kaniya aron sila magkauyab.

“Hindi niyo po alam ang punot dulo kaya wala po kayong karapatan magsalita ng ganyan,” paghot pa ni Ruru.

Nora mosulod sa politika?

Niulbo karon ang hungihong nga matud pa modagan puhon pagka-senador  ang beteranang aktres nga si Nora Aunor.

Giingong ubay-ubay ka mga higala sa aktres ang nikumbinser kaniya nga mosulod sa politika.

Tak-om lang ang baba ni Nora kalabot sa maong makapakugang nga taho.

Bea ug Derrick sikat sa Malaysia

Sa latest tweet ni  Bea Binene  , todo pasalamat ang aktres sa Malaysian fans nila ni Derrick  Monasterio.

Gikatahong nagmalampuson ang airing didto sa Malaysia  sa Kapuso series nga  “Hanggang Makita Kang Muli” .

Nagmalaumon si Bea nga makabisita puhon sa maong nasud sa higayon  nga wala na’y pandemic.

“Thank you for all the love! I can read all your comments and feedback and I’m happy that you like the show. I hope I can visit your country once it’s already safe to travel and meet you!” mensahe pa ni  Bea alang sa mga taga Malaysia

“Kung Maibabalik” ni Erik.

Gidalit sa  King of OPM Theme Songs nga si Erik Santos ang love song nga napuno sa paglaom nga nag-ulohan og  “Kung Maibabalik,” ang official soundtrack sa K-drama nga “Familiar Wife” nga gi-ere sa  Kapamilya Channel.

Gihatod sa maong awit ang pangandoy sa pagbalik sa kagahapon nga haom gyud sa istorya sa maong romance fantasy drama nga gibitoonan sa magtiayong Paolo (Ji Sung)  ug Aileen (Han Ji-min)  nga dunay tagsa-tagsa  ka kinabuhi gumikan sa wala damha nga  insidente.

Ang maong awit nalakip sa  “Erik Santos 15” album nga ubos sa  Star Music.

Ang magtiayong Moira dela Torre ug Jason Hernandez  maoy nagsuwat sa  “Kung Maibabalik” ug gi-produce kini sa  ABS-CBN Music creative director nga si Jonathan Manalo.

Loyal sa Kapuso Network

Gibutyag sa Kapuso Primetime King nga si Dingdong Dantes nga usa gyud siya ka Kapuso halos katunga sa iyang kinabuhi.

“For me a Kapuso, it means na you’re part of a family, you’re part of the home.  Lahat nang ito, na-realize ko habang naka-quarantine tayo.  Nakapag-reflect ako na halos higit kalahati ng buong buhay ko ay Kapuso ako,” suma pa ni Dingdong.

Matud pa ni Dingdong nga  ang iyang mga kabtangan ug ang pag-abot ni Marian Rivera sa iyang kinabuhi kay resulta sa iyang pagka-Kapuso.

“Sa pagiging isang Kapuso, lahat ng nakikita ko, kaliwa’t kanan sa bahay, ay mula sa pagiging Kapuso. Hindi lamang iyon, pati ang asawa ko, si Marian, sa Kapuso Network ko nakilala at ngayon may dalawa na kaming anak. Buong pagkatao ko ang pagiging Kapuso,” dugang pa niya.