Pinoy version sa Miracle in Cell No.7

CEBU, Philippines – Ang Pinoy version sa blockbuster Korean movie nga Miracle in Cell No.7 ang pelikulang  pagabuhaton nila ni  Aga  Mulach ug  Nadine Lustre.

Usa ka  drama movie  ang Ang Miracle in Cell No.7   niadtong  2013 ug nagbaha ang mga pasidungog nga nadawat niini.

Nakakuha usab kini og dakong ratings sa dihang gipasalida kini sa GMA-7  niadtong 2014.

Giingong nakasulod kini sa Top 5 sa  highest-grossing Korean film of all time.

Sila si  Ryu Seung Ryong, Kal So Won, ug  Park Shin Hye ang mga orihinal nga bida    niini.

Sa report sa PEP,  makauban nila ni  Aga ug  Nadine sa Pinoy  adaptation sa  Miracle in Cell No.7 , mao sila si  Joel Torre, JC Santos, ug  Arjo Atayde.

Si  Nuel Nuval ang direktor sa maong pelikula  ug nagplano ang Viva Films nga isalmot kini sa  Metro Manila Film Festival 2019.

Vice nalandig sa hospital

Gikumpirmar  ni  Vice Ganda  nga nalandig siya sa tambalanan hinungdan nga naka-absent siya og tulo ka adlaw sa noontime show sa ABS-CBN nga  “It’s Showtime.”

Gikatahong naglain na ang lawas ni Vice niadtong Sabado apan gidala-dala lang niya kini  gumikan sa iyang mga show.

Nakatikang pa si Vice sa live nga mga episode sa Idol Philippines  niadtong Sabado ug Domingo sa gabii .

Gipadayag  sa komedyanteng TV host nga dili angayan mabalaka ang iyang fans gumikan kay niarang-arang na ang iyang kondisyon.

Wala hinoun niya gidetalye ang rason sa pagkalandig niya sa tambalanan.

Ang rumored boyfriend ni Vice nga si Ion Perez ni-post og hulagway sa social media kun diin makita nga naa siya sa usa ka lawak sa tambalanan busa tataw nga giduaw niya ang komedyanteng TV host. 

Magkadayon kaha sa tinoud kinabuhi?

Andam si  Kyle Echarri  sa posibilidad   nga magkadayon  sila sa tinoud nga kinabuhi sa iyang ka-loveteam nga si Francine Ginto kinsa kauban niya sa Kadenang Ginto.

Napanglantawan usab ni Francine ang maong posibilidad.

 “Siguro. Kasi halos araw-araw kaming nagkikita so baka, hindi natin masasabi,” saysay pa ni Francine sa  Magandang Buhay kagahapon.

Nihirit usab si Kyle og,” “Oo, may chance.”

Gitataw hinoun ni Kyle nga bata pa sila busa dili gyud sila makahibalo sa mahimong dagan sa panahon.

“Baka po. Siguro, hindi natin masasabi. Medyo bata pa kami. Pero sa ngayon nadadala po ako sa mga eksena so baka in the future,” matud pa ni  Kyle.

Halle Bailey bida sa Little Mermaid

Nakapili na ang Disney og aktres  nga modala isip  Princess Ariel sa  live-action adaptation sa sikat nga  animated movie  nga The Little Mermaid.

Gianunsyo sa maong  movie outfit  nga ang child star ug singer nga si Halle Bailey maoy modala sa maong sikat kaayo nga  princess character.

Si Rob Marshal maoy direktor sa maong proyekto. Nasayran nga ang maong direktor usab ang naa sa likod sa  pelikulang  Woods ug Pirates of the Caribbean: On Stranger Tides. Naumol ang Little Mermaid niadtong 1989  ug pabilin kini nga ilado sa  mga bata.

Matud pa ni Halle nga “dream come true” gyud ang pag-angkon sa maong iconic role.