RIP, Chokoleit

Hello mga BisChikadora! Domingo na usab laing mga BisChika napud ang atong saw-an karung adlawa! NaHugyaw ang tanan sa kalit nga pagkamatay sa komedyante nga si Jonathan Aguilar Garcia nga mas nailhan nga si Chokoleit. Performance level lang gihapon bisa’g adunay gibati  sa lawas. Hala noh? Nakahinudum ko sa dihang duna ko’y raket sa Bohol. Unsa man pagkahitaboa nga pagkahuman sa lamiang paniudto, gi allergy ko for the first time, wala siya nadala og tambal lang. Ang nahitabo gidala ko sa hospital ug best in emergency ko. Tuod man, duna’y gi inject nga tambal,  unya kinahanglan ko mopahuway. Pak! Pagbalik nako sa hotel kay naningkamot ang akong beauty nga maulian sa akong gibati kay pagkagabii ana mag host nako sa event. Bisa’g tugnaw ang feeling kay medyo gihilantan ko gamay, the show must go on! Ang event kay sa gym mao nga medyo init plus naka jacket nanggawas ang akong singot ug didto ko nahuwasan sa akong balatian. Mapasalamaton ko sa Kahitas-an kay puwerte nakong ampo nga mahakahuman ko sa akong trabaho. Salamat kay nahuman gyud. Mao kini ang kinabuhi sa usa ka #BuhayTalent. Saludo ko ni Chokoleit sa iyang pagka professional! Rest in Peace....

Sa laing bahin, ang Coach Heidi’s Vocal Pro headed by amegang coach Heidi mag celebrate sa ilang 1st anniversary karung March 24, Domingo sa SM Seaside City Cebu. Mga Hugyaw nga performances ang ipasundayag sa iyang mga estudyante. “ Music is my life and performing has always been my first love since I was a Kid”,  BisChika pa ni coach sa inyong Yur’s truly.

Mapasalamaton kaayo si coach Heidi sa Ginoo sa gihatag niya nga talento. Karun, panahon na nga ibalik ang pabor nga gihatag sa Ginoo kaniya pinaagi sa paghatag sa iyang tibuok kasingkasing sa iyang propesyon. Mao kini ang iyang katuyoan niining kalibutana,  ug labaw sa tanan ang paghatag ug inspirasyon mga kabatan-onan sa bag-ong henerasyon. Halos napulo na ka tuig si coach Heidi sa pagtudlo, nakahatag kini kaniya og dakong kalipay ug mapasalamaton sa gihatag nga pagsalig sa iyang mga estudyante ug sa mga ginikanan niini. Na handle usab ni coach Heidi ang pipila ka mga rising stars dire sa Cebu sama ni Sheena Belarmino,  grandfinalist sa TNT Kids ug Your Face Sounds Familiar Kids Season 2; Lukas Magallano, ang 1st Promil Ishine Camp grandwinner. Vocal coach usab si coach Heidi sa sikat kaayo nga si Rowell Ucat a.k.a. Medyo Maldito ug Alem Garcia! Hugyaw ka coach Heidi and Congratulations ninyong tanan!