Anna sa 39th Cebu Pop

CEBU, Philippines – Maghugop na  ugma sa gabii, Biyernes, January 18, 2019  diha sa International Eucharistic Congress (IEC) Pavillion  ang mga mahiligon sa musikang binisaya aron mosaksi sa gikahinaman nga 39th   Cebu Popular Music Festival.

Ang Cebu Pop  nahulma  aron mosamot ang paglambo sa music industry dinhi sa Sugbo ug ang pagpadayag sa mga gibati pinaagi sa pagkanta.

Matud pa sa  event manager   sa maong kompetisyon nga si Gloria Villarojo  nga  mga hugyaw  ang 12 ka mga komposisyon  nga madungog ugma sa gabii  gumikan kay duslak gyud ang mga nagtangag nga mensahe niini.

“Maong nagpabilin ang Cebu Pop kay tungod sa kanindot sa entries niini. Nagkadugay, nagkanindot  og samot ang mga kanta  kun diin maka-relate gyud ang kadaghanan,” matud pa niya.

Karong  tuiga,  ang tulo ka mga kategoriya sa Cebu Pop naglangkob sa  Awit sa Gugma , Huni sa Kasingkasing , ug Awit sa Pagpakabana.

Ang entries sa ‘Awit sa Gugma” naglangkob sa Kon Puwede Lang (Jesson  G. Albaran)

Adto Nako (Barry Estrada Villacarillo) , Kita Nalang (Winset Rose Jacot)  ug Kung Andam Na (Frenyx Tarongoy)

Sa Huni sa Kasingkasing,  gilangkoban kini sa   Gugmang Binarkada (John Stephen L. Cadelina)  ,Hugot Pas Huot (Eller Jeff L. Escarda/ Adonis Durado)   , ABKDEGH  (Florame Mamolo) ug Bale-Balehon (Mark Eric Gavino).

Dili usab magpaulahi ang kategoriyang  Awit sa Pagpakabana nga naglangkob sa Patay Patay (Hardie Bigcas), Kabataan Bag-ong Katilingban  (Jerald Decem B. Castro) Biktima (Joseph Delima)  ug Sugbong Nahiusa  (Clark Geraldizo) matud  pa niya nga angayan atngan ang  maong programa gumikan kay napuno sa mga surprisa ang    matag komposisyon nga nagtangag sa hugyaw nga mga mensahe.

Ang Sugbuanon  nga international singer   nga si Anna Fegi- Brown maoy special  guest sa maong kalihokan.

Matud pa ni Villarojo nga gusto sa production team nga dunay dugong Sugbuanon nga  nakahatag og garbo sa Cebu ang buot nila nga mo-guest karong tuiga hinungdan nga nilutaw ang pangalan ni Anna.

“Kahibalo na baya ta nga basta mo-perform na si Anna, dili gyud na basta-basta.   Maka-proud kay  bisdak  pud,” suma pa ni Villarojo.

Nakadayeg si Villarojo ni Anna  gumikan kay dili gyud kini  magduha-duha sa pagdawat og event nga duna’y kalabotan sa kapistahan sa balaang bata.

Naandan na usab nga mosayaw sa maong kalihokan ang  UV Dancen Troupe.

Namugna ang maong song-writing contest  isip halad alang sa balaang bata nga si Señor Sto.  Niño.

Mahulog nga karaan na   ang maong kompetisyon, busa  nagpakita lang kini nga pabilin nga gihangop sa katawhan ang  mga Sugbuanong awit.

Kahinumdoman nga  gatosan ka entries ang nadawat sa screening committee sa maong kalihukan nga gipahigayon sa miaging tuig ug 12 lang ang  napili alang sa palaran nga komposisyon.

Dugang pa niya nga   dili basta-basta ang pag-screen sa entries gumikan kay niabot kini og 12 ka oras. Ang mga nag-screen sa entries mao sila si Britz Briones, Giron Del Rosario, Baby Condeno, Maria Donna, Preciosa Bacalso, Jet Gonzales, ug Sam Costanilla

Ang Cebu Pop maoy  tinuig nga halad ni  kanhi First District Representative ug kasamtangang mayor sa Talisay City nga si  Eduardo R. Gullas  isip pagpadayag sa iyang dakong gugma ngadto sa Balaang Bata nga si Señor Santo Niño ug agig pag-abag usab sa paglambo pa sa Sugbuanong musika.