Nataypan sa presidente sa Singapore

CEBU, Philippines — Mapasigarbuhon nga gipadayag nila ni Francis Concepcion, Mackie Empuerto, ug Kiefer Sanchez kinsa naila karon isip TNT Boys nga naka-perform sila sa charity event nga gipanguluhan sa pangulo sa Singapore nga si President Halimah Yacob. Gipakpakan gyud ang tulo tungod sa ilang version sa classic hit nga “The Greatest Love of All”. Dakong pasalamat sa tulo gumikan kay nahimamat nila sa personal ang presidente sa maong nasud  kinsa niadto gyud sa backstage aron magpakuha kanila og hulagway.

Gusto nga sundan

Gikalipay pag-ayo ni Direk Dan Villegas nga nahimong box office blockbuster sa unang higayon ang pelikula nga gihatagan niya og direksyon nga “Exes Baggage” nga gibidahan sa nabanhaw nga loveteam nga sila si Carlo Aquino ug Angelica. Giangkon ni Direk Dan nga unang higayon niya nga makasinati nga mahimong hit sa takilya ang iyang pelikula. Gani, ug mahatagan og higayon, buot niya nga sundan og laing pelikula ang CarGel.

Ipaapil ang anak

Suma pa ni Piolo Pascual nga buot niya nga ipadala ang iyang anak nga si Iñigo alang sa usa ka International movie project. Si Piolo usa sa mga nahimong delegado gikan sa Pilipinas sa Busan International Film Festival. Sa maong kalihukan gitanyagan si Piolo  gikan sa usa ka international movie producer nga mugama og proyekto nga abagan sa iyang movie outfit nga  Spring Films. Gusto sa aktor nga  malakip si Iñigo niini.

Tambag sa manghod

Gitambagan ni  Diego Loyzaga   iyang igsuon nga si Angelina Cruz  nga dili gyud angayan usikan ang mga maayong opurtunidad nga nadawat niini sa showbiz. Matud pa ni Diego nga pinangga niya ang iyang mga igsuon bisan og dili sila susama og inahan. "Sinabi ko na sa kanya, 'Butching, if I was in your situation, the way that you are being guided right now sa edad mo, sa industriya, focus ka muna sa work. Strike while the iron is hot.  You are doing so good”, suma pa ni Diego.

Paghulagway ni Bea

Gihulagway ni Bea Alonzo nga usa ka mapailubon nga pagkatawo ang iyang co-actor nga si Aga Muhlach sa pelikula nga “First Love”. Matud pa ni Bea nga usa pa sa sekreto nga iyang nasayran ni Aga kabahin sa relasyon ngadto sa asawa niini nga si Charlene mao ang pagkamatinud-anon sa istorya ug buhat. “Kasi kapag gagawa siya ng isang bagay, he makes sure na ibibigay niya ang buong puso at kaluluwa niya dun”, suma pa ni Bea.

Ka-afford ra

Istorya pa ni Cristalle Bello nga dili na niya kinahanglan nga ipaagi og breastfeed ang iyang anak. Matud pa niya nga maka-afford siya sa mahimong milk supply sa iyang anak nga si Hunter.

Trabaho gihapon

Usa ka batang babaye ang gisabak sa  The Clash finalist nga si Miriam Manalo. Gipakita niya sa iyang Instagram followers ang sonogram sa iyang anak. Dugang pa ni Miriam nga magpabilin una siya nga regular nga performer sa programa nga Studio 7 sa Kapuso Network ug mopahuway lang siya kung  hatagan na siya og advice sa doktor.