GMA dunay bag-ong musical-variety show

CEBU, Philippines — Giluto na karon sa GMA-7 ang bag-o nila nga musical-variety show nga nag-ulohan og Studio 7 ug langkoban kini nila ni Migo Adecer, Kate Valdez, Gabbi Garcia, Mikee Quintos, ug  Julie Anne San Jose.

Malakip usab niini sila si Christian Bautista, Mark Bautista ug ang comedy tandem nga  DonEkla (Donita Nose ug  Super Tekla).

Molugwa usab sa maong show ang bag-ong Kapuso stars nga sila si Mavy Legaspi, Kyline Alcantara, ug Rayver Cruz .

Sa report sa  GMANetwork.com nga pipila sa  finalists sa  ongoing reality show nga  The Clash ang gikatahong malakip sa  Studio 7.

Magsilbing director sa Studio 7 mao ang dance choreographer ug music video director nga si Miguel Tanchanco, ang anak sa kanhi  choreographer sa SOP nga si  Geleen Eugenio.

Naka-perform na usab si Miguel kaniadto sa Party Pilipinas. Malakip usab sa production team sa maong show ang anak ni Gary Valenciano nga si Paolo.

Suma pa sa report, molugwa  ang maong show  sugod karong  October 14 sa GMA-7’s Sunday primetime block.

Marian walay angay

Gipahimangnoan sa talent manager nga si Rams David ang usa ka basher nga unta maghinay-hinay sa pagamit og pulong nga makapasakit sa ilang isigkatawo.

Nasayran nga nagkalain-lain ang komento ang nadawat sa iyang mga alaga nga sila si Maine Mendoza ug Marian Rivera.

Dili pa lang dugay, nakadaog si Marian sa EdukCircle isip usa sa most influential female endorsers of 2018.

Usa ka netizen ang nilenggua nga wala’y angay si Marian ug nga si Maine ang haom sa maong pasidungog.

Apan suma pa  ni Ram nga nalakip si Maine sa lima sa nakadaog niini, busa dili na lang unta angayan intrigahon. Gawas pa, managsama sila og management.