Eskina tampo tips aron dili mahupas ang gugma

Barangay RT 99.5

Dili   na bag-o kon makadungog ka og mga istorya nga duna’y manag-uyab  nga nagbuwag gumikan kay nahupas na ang gugma sa ilang partner.

Common na kaayo ang maong sitwasyon gumikan kay dili ganahan ang tawo nga magpabilin sa usa ka relasyon  diin wala na sila’y feelings sa ilang partner.

Apan duna’y mga pamaagi  aron  malikayan ang maong sitwasyon.  Kon mosulod gani og usa ka relasyon, kinahanglan nga buhaton nimo ang  pipila ka mga butang aron dili mahupas ang feelings sa imong partner diha kanimo.

Puwes  mga ka-barangay, ania ang akong simple tips alang kaninyo.

1. Likayi ang sobra nga pagkamalimtanon. Likayi ang pagkalimot sa mga importanteng detalye nga naglambigit ninyong duha susama sa birthday sa imong partner, monthsary ug anniversary, ug ang mga nindot nga nahitabo ninyo. Dapat noted na tanan. Ug ang pinaka importante mao imong mga saad niya sa panahon nga nanguyab paka niya.

2. Limitahi ang mga butang nga maka-distract ninyo. Daghang mga butang karong panahona nga pwedeng makaguba og relasyon. Susama sa social media or mga internet apps, ang pag- entertain og ubang tawo ilabi na ang pakipaglambigit sa laing tawo pinaagi sa chatting or ba kaha secret convo nga makapaselos sa imong partner. Susama pud sa online games, likayi nga moabot sa punto nga nahurot na ang imong oras sa pagduwa -duwa sa paborito nimong online games.

3. Ayaw pasagdi imong partner.  Ihatag niya ang attention nga para rajud sa imong partner ug pareha sa attention nga imong gihatag kaniya sa panahon nga nanguyab paka niya or sa bag-o pamo.

4. Dili mag duwa-duwa. Ang relasyon dili lingaw-lingaw. Undanga ang pag duwa-duwa sa imong karelasyon. Timan-e, tawo na ang imong gikalambigit sa imong kinabuhi, dili duwaan.

5. Likayi ang pagsige  og duda nga binuangan ka. How can you trust yourself, if you don’t trust God, and how can you trust others, if you don’t trust yourself. Ug wala ka anang mga butanga, lisud i-work out ang tanan. Simple ra gyud na. Dapat magkuyog nang mga linyaha. Saligi ang Ginoo nga naa gyuy gitagana para nimo. Ug saligi imong kaugalingon, para makuha nimo ang salig sa imong partner.

6. Ayaw ikumpara imong present partner ngadto sa imohang ex.  Timan-i nga managlahi gyud og kinaiya o batasan kada usa kanato. Dawata siya kon  unsa ug kinsa siya. Huna-hunaa ang tinuod nga paghigugma walay daghang kondisyon, walay daghang balaod.

7. Ayaw pagsige og pamakak.  Pagpakamatinud-anon nga partner ug ayaw gub-a ug sayangi ang pagsalig nga gihatag sa imong partner diha kanimo. Ang pagpamakak sa tawo nga nagpangga nimo susama ra nga imong gibakakan ang imong kaugalingon.

8. Likayi ang pagsulti og mga sakit nga mga pulong ug ang pagpanapat. Susama anang pagpamalikas sa imong partner ilabi na kon naa moy giawayan or gidebatihan nga makapainit sa inyong ulo. Kontrola gyud ang imong kaugalingon, bisan gisapot naka og maayo.

9. Likayi ang bisyo. Bisan unsa pa nga aspeto, wala gyuy mahatag nga kaayohan  ang  dautang bisyo. Ampingi ang  dungog sa imong partner ngadto sa iyang pamilya.

10. Ginadili ang “paasa” . Kon duna mo’y mga kasabotan, dapat tumanon gyud ninyo. Sama na lang kon duna mo’y gi-set nga adlaw alang sa inyong date o baka nagsabot mo nga mobakasyon mo aron mo-relax. Kinahanglan nga dili gyud nimo siya palaumon. 

(Madungog si Papa P o Piolo Askal   sa Barangay RT 99.5   sa programang  Wanted Sweetheart , Monday- Saturday , 9pm- 12 midnight) Papa Piolo Askal