Lima ka titulo ang nagpahipi

Bb. Cebu 2018

CEBU, Philippines — Opisyal na nga gipaila sa publiko ang mga maanyag nga mga kandidata karong tuiga kinsa mao ang magtigi sa titulo nga Binibining Cebu 2018. Nahitabo kini niadtong Biyernes sa hapon sa Mountain Wing Atrium sa SM Seaside City Cebu.

Moabot ngadto sa 54 ka mga kandidata gikan sa nagkadaiyang bahin sa Sugbo ang nanghinaot nga makalangkat bisan usa sa  lima ka korona nga gidalit karong tuiga sa labing prestihiyoso nga Binibining Cebu.

Gikan sa mga titulo nga  Binibining Cebu, Binibining Cebu Tourism ug Binibining Cebu Charity, gipun-an kini sa komitiba og duha ka mga dagko nga mga titulo nga mao ang Binibining Cebu Heritage ug Binibining Cebu Ecology aron mas mapalapdan pa ang mahimong maambag  niini ngadto sa komunidad.

Ang Binibining Cebu Heritage mao ang mahimo nga mo-promote sa kultura sa Sugbo ug ang Binibining Cebu Ecology mao ang mahimong mopasiugda sa mga programa nga mapreserbar ug mapalambo ang atong kinaiyahan.

Gibutyag sa pangulo sa Sacred Heart School for boys Batch 1985 Foundation Inc., ug sa Bb. Sugbu Foundation Inc. nga si Kenneth Lim nga karon nga nadungagan ang matugyanan og katungdanan karong tuiga aron mas mahatagan pa og pagtagad ang labing gagmay ngadto sa dako nga munisipalidad o siyudad dinhi sa Sugbo. Dugang pa nga pinaagi sa maong pamaagi, mahimong maila ang tibuok kalibutan kun unsa ang maidalit sa Sugbo ngadto sa tanan.

Gipasalig sa Bb. Sugbu Charity Foundation, Inc. ug the Sacred Heart School for Boys Batch 1985 Foundation Inc. nga mahimong mas engrande ang mahimong indigay karong tuiga karon nga anaa na kini sa ikaduhang tuig sa pagpahigayon sa maong kalihukan.

Sama sa miaging tuig, ang maong kalihukan giorganisa kini sa mga lig-on organizing team nga sila si Cary Santiago kinsa mao ang molihok isip pageant chairperson.

Inabagan kini nila ni Raymond Tio mao ang mahimong project chairman,  Victor Hao Cuenco nga mao ang artistic director ug sa inila nga designer nga si Kenneth Cobonpue nga mao ang mahimong creative producer.

Karong tuiga, gilangkuban ang mga kandidata sa mga bag-ong tubo sa pagsalmot og indigay, mga nakaangkon na og dagkong titulo sa kauluhan ug  single moms maingon nga mipadayon sa ilang damgo nga makasalmot og pagbalik sa niining matang sa indigay nga ilang naandan kaniadto.

Ang  single moms mao sila si Miss Philippines Earth Water 2014 Kim Covert gikan sa Alegria; ang dentista nga si Amelie Mira Grauel gikan sa  Compostela; Airline Information Science major nga si Marie Shane Ortega sa Dumanjug; ang Mutya ng Pilipinas 2012 Second runner-up Sharon Angel sa Ginatilan; ang Slimmers World International Second runner Up nga si Ivy Tapic sa Naga City; ug ang model Mary Grace Castillo sa San Fernando.

Mapasalamaton ang single moms sa dakong kahigayunan nga gitanyag sa Binibining Cebu tungod kay mao kini ang maong kompetisyon nga mibukas og pultahan aron mapadayon ang gituohan nila nga maputol nila nga pangandoy nga makarampa sa dako nga entablado.

Dugang sa mga kandidata mao ang mibalik sa pagsalmot mao sila si Tracy Maureen Perez ug si Lou Dominique Piczon kinsa karon mao ang mobandera sa Madridejos ug Ronda.

Maingon nga dili sab gyud basta-basta ang mga kandidata karong tuiga gumikan kay lakip sab karon ang bag-ohay lang nga nakoronahan isip Hiyas Nan Carrascal nga si Isabella Deutsch kinsa midala karon sa Borbon; ang Miss Ormoc 2018 First runner-up nga si Princess Donah Paraiso sa San Francisco; Miss World Philippines 2012 Second runner-up nga Vanessa Ammann sa Cebu City South; ang Miss Mandaue 2017 Ralphiela Lewis sa Badian ug ang Miss Mandaue 2013, Reyna ng Aliwan 2014 ug Miss Beauche 2015 nga Steffi Aberasturi sa Mandaue City.

Ang mikompleto sa listahan sa mga kandidata mao sila si Augustina Odever sa Alcantara; Grace Nooriza Lumbang sa Alcoy; Angeli Christine Navarro sa Aloguinsan; Kinji Salas sa Argao; Allison Lo sa Asturias; Alaia Doverte sa Balamban; Mary Jae Felizarta sa Bantayan; Marie Leolie Ursal sa Barili; Mariah Gelina Lequin sa Bogo City; Sheena Marie Selerio sa Boljoon; Aeryka-Amm Robyn Pineda sa Carcar City; Teri Marina Colmenares sa Carmen; Karen Keith Go sa Catmon; Dianne Padillo sa Cebu City North; Jasmier Murray sa Consolacion; Melody Ann Infante sa Cordova; Rebekka Arnesen sa Daanbantayan; Princess Joesel Bajamonde sa Dalaguete; Christine Rudolph sa Danao City; Maria Cielito Abendan sa Lapu-Lapu City; R-Jane Lugod sa Liloan; Marianel Sacal sa Malabuyoc; Sheena Balansag sa Medellin; Kristine Gillamac sa Minglanilla; Shaina Fame Mabatid sa Moalboal; Rubby Clavel Verano sa Oslob; Gerly Cotimar sa Pilar; Arianne Manquiquis sa Pinamungajan; Freelyn Mae Flores sa Poro; Ivy Esparcia sa Samboan; Kemberly Gillamac sa Santa Fe; Maria Fe Loayon sa San Remigio; Nina Jane Cumayas sa Santander; Ralene Lagudas sa Sibonga; Angel Kate Uy sa Sogod; Janine Gonob-Gonob sa Tabogon; Zenny Shun sa Tabuelan; Raschel Uy sa Talisay City; Mary Grace Tautuan sa Toledo City; Trixie Ong sa Tuburan; ug Sheene Lady Maxelle Paller sa Tudela.

Ang mga mihupot sa mga korona nga sila si Binibining Cebu 2017 Apriel Smith, Binibining Cebu Tourism Samantha Lo ug Binibining Cebu Charity Maria Gigante mao karon ang mamahimong tigiya sa mga kandidata aron maoy motudlo sa ilang mga nasugdan nga mga proyekto.

Sa laing bahin, duha ka mga pre-pageant activities ang ipahigayon karong tuiga. Mao kini ang Swimsuit Pre-pageant Gala Dinner nga mahitabo karong Septiyembre 26, ug ang Pre-Pageant Interview nga mahitabo karong Oktubre 14 nga ipahigayon didto sa Mandani Bay.

Ang Grand Coronation Night mahitabo karong Oktubre 19 sa Pacific Grand Ballroom sa Waterfront Cebu City Hotel and Casino.