Mrs. Chiong mingaab

CEBU, Philippines – Mainitong gihangop sa Sugbuanon ang premiere night  sa pelikulang  Jacqueline Comes Home niadtong Martes sa SM City Cebu-Cinema 1.

Danguyngoy ang nahimong reaksyon sa pamilya Chiong ilabi na ngadto kang  Thelma Chiong kinsa mao ang inahan sa duha ka biktima nga si Jacqueline ug Marijoy Chiong sa insidente nga nahitabo nga rape ug pagpatay niini pila ka tuig na ang nilabay.

Wala gitiwas sa magtiayon ang pagtan-aw niini gumikan kay dili nila makaya ang mga eksena nga nakabalik sa  ilang panumduman.

Ang  anak ni Carlo J. Caparas nga si Ysabelle Peach maoy direktor sa maong lilas.

Mao kini ang labing una nga feature film ni Direk Peach. Matud pa ni Direk Peach nga ang iyang amahan mao ang nagtukmod kaniya nga hatagan og katumanan  ang hangyo sa anhing inahan niya nga si  Donna Villa nga mugnaan kini og pelikula.

“I do not know if proud she is for me right now but granting mga mother’s request to do a film with Chiong sisters’ case is just a big leap for me. This is really a serious case in Cebu. When my dad said na gawan ko daw to nga pelikula like I was a bit of shocked and after that I did all the research that I could do for me to push through with this”, matud pa niya.

Dako ang iyang pagpasalamat ni Direk Peach ngadto kang Mrs. Chiong kinsa miuyon na nga himuan og pelikula ang trahedya nga nahitabo sa ilang kinabuhi.

Human sa pagpakita sa maong pelikula, dali nga gigakos ni Direk Carlo si Peach tungod kay puno gihapon ang sinehan ug gitapos gyud sa mga Sugbuanon ang pelikula.

Midagan sa duha ka oras ang pelikula ug nagtangag kini sa mga eksena kun unsa gyud ang mapintas nga mga panghitabo sa managsuon niadtong mga panahon nga anaa sa kadautan ang ilang kinabuhi.

Gipakita sa maong salida ang kahimtang sa pamilya Chiong ug kun unsa ang ilang mga kasinatian sa dihang nagpadayon ang imbestigasyon sa maong insidente.

Ang maong pelikula mituldok usab sa spekulasyon nga buhi ang anak nga si Jacqueline ug hangtud karon wala pa gyud hingpit maaninag ang lawas niini.

Gibituonan ang maong pelikula nila ni Donnalyn Bartolome ug Meg Imperial kinsa sakop sab sa Viva Artist Agency.

Gibutyag ni Meg nga gidawat niya ang maong proyekto tungod kay gipasaligan siya sa direktor nga wala ray angayan nga kahadlukan sa pagdala sa maong karakter.

“Sabi naman ni Direk na safe naman daw kami. Ginagawa ko lang po yung trabaho ko dito at binasa ko yung script at medyo okay naman sa’kin kasi nga panibagong sabak naman ito para akin”, suma pa ni Meg.

Sa habig ni Donnalyn, mao kini ang labing kuyaw ug senswal nga pelikula nga iyang nahuptan.

“This is the first time I did a rape scene. Para sa akin, risky siya pero may tiwala naman ako na makakaya ko kasi ang rami ng tumulong sa akin at kay Ryan Eigenman naman, hasa na siya sa ganito so ako nalang yung tinuturuan. Mabuti nalang nakuha ko agad yung hinihingi nila Direk”, saysay pa ni Donnalyn.

Bisan og napuno sa pang-bash karon si Donnalyn tungod sa testament nga iyang gipagawas kabahin sa pelikula nga  “non-biased”, gipasalig sa aktres nga ang kamatuoran anaa gyud  nalakip sa pelikula.

Dungag pa ni Direk Peach nga dili  unhan og mga negatibong istorya ang pelikula gumikan kay ang mga wala pa makakita, wala pa masayod sa unsa ang kamatuoran. Gidapit niya ang tanan nga mosaksi sa maong pelikula aron dili lang ang usa ka habig ang dapigan apan lakip na sab ang naapektuhan sa maong insidente nga hangtud karon, lab-as pa sa panumduman.