12th Huniño na ugma

CEBU, Philippines — Mosikad na ugma sa  alas 7:00 sa gabii, April 25 ang gipaabot sa kadaghanan nga 12th Huñino o Huni Halad Alang Kang Santo Niño de Cebu Original Song Writing Competition nga mahitabo diha sa Pilgrim Center sa Basilica del Sto. Niño.

Si Yessha dela Calzada nga produkto sa D' Voice Kids ubos sa Team Lea Salonga maoy special guest sa maong kalihokan.

Nasayran nga ang maong song writing contest, gitumong sa mga paring Agustino aron pagpalapad pa sa debosyon ngadto sa Milagrosong Bata.

Suma pa sa head sa secretariat sa Huñino nga si Fr. Ric Reyes nga nagkalig-on og samot ang entries karong tuiga.

“Nindot gyud paminawon ang songs kay kasagaran kay mga bag-o gyud nga estilo, kanang kanta nga dali ra matiman-an sa mga tawo,” matud pa ni Fr. Ric.

Dugang pa niya nga dako gyud og natabang ang gipahigayon nila nga libreng seminar nga gidalit nila sa  nagkadaiyang composers sa Sugbo.

“Tungod sa seminar, nakakuha sila og dugang idea sa pagmugna og kanta alang sa simbahan. Unsaon paghan-ay sa mga linya ug uban pa,” dugang pa niya.

Sa maong kalihokan padayon nga natabangan ang mga beneficiaries sa BMSN Children's Welfare Foundation.

Nagkadugay gyud ang maong kompetisyon, nagpaila lang nagpabiling buhi ang local music ug nagbaha gyud ang mga tawo nga duna’y talento sa pagama og kanta nga halad alang sa balaang bata.