Claire, labing unang Star of the Night

CEBU, Philippines — Hingpit na gyud nga gilusad  ang usa sa labing giatangan nga mga pasundayag sa Sinulog Festival, ang Sinulog Idol Season 9.

Gipahigayon kini diha sa Plaza Independencia niadtong Biyernes sa gabii diin nagtigi ang 12 ka finalists pinaagi sa duha ka hugna nga kompetisyon: Idol’s Choice ug Group Performance.

Ang 12 finalists naglangkub kanila ni Rey Ann Kate Ortouste, Claire Ann Yongco, Frianne Mackenzie Omega, Angelica Maranan, Justine Mae Mantua, Shenahia Postrero, Joey Atillo, Jaymar Ostria, Arnold Badana, Jeyve Daño, Aljay Camingao ug Jhun Camille Ian Casiño.

Gideklarang labing unang Star of the Night alang sa Idol’s Choice segment mao si Claire Ann Yongco, 17 anyos, Grade 11 student sa University of San Jose Recoletos.  Ang awit nga nagpadaog niya niadtong gabhiuna mao ang Wind Beneath My Wings ni Whitney Houston.

Gibutyag ni Claire nga lakip sa iyahang preparasyon mao ang pagkatulog og sayo ug pagbansay og maayo sa wala pa ang performance night.

“Nag-practice gyud ko, akong gipaningkamotan nga matog og sayo. Wala gyud ko nag-expect nga ma-Idol Star of the Night,” butyag niya ngadto sa Banat News Hugyaw.

Sigon pa sa komento ni Ultimate Celebrity Vocal Coach Jay Unchuan ngadto sa Solo performance ni Claire, dili siya ganahan og bata kay dili pa makamao muhatag og kinabuhi sa usa ka kanta nga puno sa emosyon apan  gipamatud-an sa batang kontesera niadtong gabhiuna nga dili babag ang linghod nga pangidaron sa pagstand-out batok sa kaubang Idols.

Si Claire maoy labing bata sa 12 ka finalists.

Nahimutang sa bottom three sila si Ostria, Omega ug Atillo. Hinuon, nahukman sa mga hurado nga wala unay palagputon gikan sa kompetisyon niadtong gabhiona.

Samtang gidekla-rang Best Group of the Night mao ang Tri-Angles nga gilangkuban nilang Jayvee Dano, 25; Joey Atillo 25; ug Aeon Casiño, 22. Ang hugyaw nga blending sa ilahang tingog ug limpyo nga blocking ug choreography maoy nakapadaog sa grupo samtang giawit ang Everybody sa Backstreet Boys.

“We were given two days to rehearse but dili gyud siya whole day and then our preparation kay prayers lang gyud and keep ourselves healthy,” sigon pa ni Jayvee.

“We came up to an idea nga boyband nga sikat unya maka-relate ang maminaw,” ni Joey pa.

Ang Sinulog Idol judges gilangkuban sa Banat News Hugyaw Editor Ryan Mark Borinaga, former Pinoy Dream Academy scholar Apple Abarquez ug ni Unchuan.

Ang host niadtong gabhiuna mao si Sam Costanilla kauban ang guest hosts nga silang Vida Reya ug Fidel Cascabel.