Miss Olive-C migraduwar isip cum laude

CEBU, Philippines - Lain na usab nga pasidungog ang nasakmit sa Sugbuanon ug kasamtangang Miss Olive-C Campus Model Philippines nga si Princess Figuracion Jayme. Migraduwar siya sa kursong Bachelor of Arts in Communication isip cum laude diha sa Cebu Normal University sa miaging semana.

Gipamatud-an sa beauty and brains nga Sugbuanon nga ang sekreto aron mahimong mabungahon ang kinabuhing estudyante mao ang pagbalansi sa tanan. Matud pa sa chinita beauty queen nga daghan ang miawhag kaniya nga dili na lang mosalmot sa mga beauty pageant aron dili siya mabalda sa iyang pagtuon. Apan gipadayon niya ang iyang gusto nga wala maapektuhi ang iyang pag-eskwela. Hugot ang iyang pagtuo nga ang labing maayong estudyante mao kadtong kamao mobahin sa iyang oras.

Si Princess mao ang ikaduhang Sugbuanon nga nakoronahan isip Miss Olive-C, human kang Muriel Orais kinsa maoy labing unang nakoronahan sa maong pageant niadtong 2010. Nagtrabaho na karon si Muriel isip flight attendant sa Philippine Airlines ug nagplano nga mosalmot sa Bb. Pilipinas sunod tuig.

Malipayon usab si Psalmstre chief executive officer Jim Acosta, kinsa kasamtangang atoa sa Saudi Arabia, tungod sa kalampusan ni Princess. Matud niya nga ehemplo si Princess sa usa ka modernong Pilipina nga utukan, maanyag, ug adunay diskarte sa kinabuhi.

Gikatakda nga ipasa ni Princess ang iyang korona isip Miss Olive-C Campus Model Philippines sayo sunod tuig didto sa Manila.