Erich mihimakak

CEBU, Philippines – Gihimakak ni Erich Gonzales ang report nga matud pa nag-ipon na sila og puyo sa iyang boyfriend nga si  Daniel Matsunaga . Suma pa sa aktres nga mahitabo ra gyud kini kung kaslon na silang duha.

Jake inilog na

Ubay-ubay ka mga show sa GMA-7 ang gustong kuhaon  si Jake Ejercito isip guest.  Kalit nga nisaka ang popularidad ni Jake human sa iyang paglugwa sa kalyeserye sa Eat Bulaga. Aduna na pu’y mga sikat nga magazine ang gustong mo-feature kaniya.

Piolo nagbangotan

Dili gyud makalimot si Piolo Pascual kang German Moreno gumikan kay mao kini nagtudlo kaniya aron mahimong confident atubangan sa camera. Nahimong kabahin si Piolo sa kanhi youth-oriented show ni Kuya Germs nga That’s Entertainment busa nagbangotan siya sa kamatayon sa TV host.

Meryll sa little nanay

Mosulod na ang karakter ni Meryll Soriano sa seryeng  Little Nanay sa GMA-7. Labing bag-o  nga gipasulod  sa maong show mao ang aktor nga si Christopher de Leon.

Giimbitar si Steve

Sa radio ug TV interview  ni Miss Universe 2015 Pia Wurtzbach didto sa Amerika, gipasigarbo niya pag-ayo ang tourist spots sa Pilipinas. Giimbitar niya nga mosuroy sa nasud ang kontrobersyal nga host nga si Steve Harvey .

Gibasted

Giangkon ni Ash Ortega nga midiskarte kaniya ang laing  GMA artist nga si Juancho Triviño apan wa  niya sugta gumikan kay dili pa siya andam makauyab.  Nagpabilin ang kasuod sa duha ug duna’y panahon nga mag-uban sila sa pagpanuroy.

JaDine gikagubtan sa california

Gikagubtan pag-ayo sa mga Pinoy didto sa Sacramento, California ang mga bida sa On The Wings of Love nga sila si   James Reid ug Nadine atol sa ilang fans  day sa maong dapit sa miaging adlaw. Kauban usab nila si Paulo Avelino ug ang nagkanta sa themesong sa maong show  nga si Kyla.

Sundon gyud

Gipadayag ni Rocco Nacino nga  dili lalim ang pagdala niya isip  Andres Bonifacio sa  pelikula gumikan kay gisunod gyud niya ang mga pulong nga naa sa script ug dili mahimong mo-adlib. Matud pa niya nga importante kaayo ang matag pulong nga ilitok sa maong pelikula.

Giluwas sa direktor

Tsika pa ni Direk Joyce Bernal nga maayo ang performance ni Xian Lim sa pelikulang Everything About Her nga gibitoonan usab nila ni Angel Locsin ug Vilma Santos. Gibutyag kini sa direktor human sa pagkuwestiyon sa mga kritiko ni Xian kung nganong nalakip kini sa maong pelikula.

Hele pasok sa Berlin Filmfest

Misalmot ang pelikula nila ni John Lloyd Cruz ug Piolo Pascual nga “Hele Sa Hiwagang Hapis” sa 66th Berlin International Film Festival.

Mao kini ang labing una nga higayon nga nag-uban sila si Piolo ug Lloydie sa usa ka movie project.

Ubos sa direksyon ni Lav Diaz ang maong pelikula  ug motigi kini sa laing 14 mga pelikula sa  Bosnia and Herzegovina, Canada, Denmark, France, Germany, Iran, Italy, Netherlands, Poland, Portugal, Singapore, Sweden, United Kingdom ug US.

Ang  “Hele sa Hiwagang Hapis” naghisgot sa pagpangita sa lawas  ni Andres Bonifacio ug gi-produce kini sa  TEN17P Productions nga gipanag-iya ni Paul Soriano.

Gawas nila ni Piolo ug John Lloyd , nalakip pud sa maong pelikula sila si  Cherie Gil, Bernardo Bernardo, Alessandra de Rossi, Sid Lucero ug Angel Aquino.

Gi-shoot sa  Sorsogon sa miaging tuig ang pipila sa mga  eksena sa maong pelikula.

Istrikto nga hurado

Gibutyag ni Vice Ganda nga  andam na siya  alang sa iyang  bag-ong tahas   isip  hurado sa latest season sa  “Pilipinas Got Talent”

Gipasalig niya nga   sakto gyud ang mapili nga mananaug nga dunay tinud-anay nga talento  ug dili lang kutob sa kaluoy.

Gibutyag ni  Vice  nga istrikto siya nga pagkahurado apan dili gyud mawagtang ang pagtunol niya og  komedya sa mga tawo.

“Ang tagal na din akong napapanood na mag-judge ng mga tao. Siyempre ang laki din ng pa-premyo nila — P2 milyon — hindi ba? Gusto kong maging deserving ito. Ayaw kong maging ‘Pilipinas Got Awa’ lang itong palabas natin. Gusto ko talagang talento, deserving. Talagang lahat ng makakapanood ay magde-desisyon na tama ‘yung napili namin at lahat ay mapapa-clap champion,” nagkanayon si Vice ngadto sa ABS-CBN News.

Sinulog Idol Day 4 Transgender ang Star of the Night!

Siyam na lang ka idols ang nagtigi atol sa Rock Night sa nagpadayong Sinulog Idol 2016 diha sa Fuente Osmeña Circle kagabii.

Kini human natangtang atol sa Bisaya Night niadtong Lunes, si Jessie Joy Veado sanglit wala mauyoni sa mga hurado ang iyang pag-awit sa “Ikaw ug Ako sa Kangitngit.”

Nakuwangan ang mga hurado nga naglangkob nila ni Ultimate Voice Coach Jay Unchuan, former Pinoy Dream Academy scholar ug World Championships of the Performing Arts gold medalist Apple Abarquez ug Banat News Hugyaw editor Ryan Mark sa kinantahan ni Jessie Joy.

Alang nila, kuwang sa kinabuhi ug hilaw ang performance niining maong finalist nga residente sa Barangay Parian. Nakauban niya sa bottom two si Niña Riza Naputo, nga taga Liloan, Cebu

Samtang wala nagdahom ang transgender nga si Kristoffer Kristie Bedua nga siya maoy mapili nga Star of the Night pinaagi sa iyang paghatag og kinabuhi sa awit nga “ Kamingaw sa Payag”. Alang sa mga hurado, si Kristie ang nagpakita og labing dakong kalambuan sa performance niadtong gabhiona.

Kini kay sa unang tulo ka mga gabii, nabantayan sa mga hurado nga pa gwapa gwapa lang ang kinantahan ni Kristie hinungdan nga kanunay siyang gitambagan nga kinahanglang ipakita na gyud niya kun unsay iyang ikabuga aron dili siya matagak.

Ug tuod man, nasabtan sa mga hurado niadtong gabhiona nga “pang diva” diay ang haom nga packaging ni Kristie. Si Kristie lumad nga taga Barangay Pasil, niining dakbayan.

Nakauban niya sa top 3 sila si Denise Jeremiah Exaltacion nga taga Barangay Guadalupe ug Jose  Thaddeus Roble III nga naggikan sa Dakbayan sa Danao.

Nasayran nga sa unang gabii sa kumpetisyon, napili nga Star of the Night si Roble. Niadtong gabhiona, ang idols maoy nagpili sa ilang awit ug walay gitangtang ang mga hurado.

Pagka ugma, fast song ang giawit sa idols diin si Exaltacion ang nigawas nga labing maayo nilang tanan. Sa mao usab nga gabii, wala nakatambong ang finalist nga si Benedict Paraiso  nga taga Talisay City gumikan sa mga kakulian, hinungdan nga gi-disqualify siya gikan sa panagtigi ug walay gitangtang ang mga hurado.

Sa ikatulong gabii sa panagtigi, napiling Star of the Night si Kayla Barrientos diin #Hugot song ang ilang gikanta. Gitangtang sa mga hurado si Mary Abigail Salimbagat, 24 anyos nga nurse gikan sa  Consolacion, Cebu.

Gipaabot nga mapili na ugma puhon ang unom ka finalists nga maoy magtigi alang sa grandfinals karong Huwebes, January 14, diha gihapon sa Fuente Osmeña Circle.

Ang ikapitong edisyon sa Sinulog Idol ubos gihapon sa Sinulog Foundation ug gidumala sa Soundtraxx Production Studio nga gipanag-iya sa magtiayong Gani ug Gloria Villarojo.