Jen kalmado lang

CEBU, Philippines – Gibutyag ni Jennylyn Mercado nga wala niya gi-pressure ang iyang kaugalingon nga makadawat og acting award karong tuiga sa Metro Manila Film Festival alang sa pelikula nila ni Jericho Rosales nga Walang Forever. Kahinumduman nga si Jennylyn maoy best actress sa MMFF sa miaging tuig alang sa pelikulang English Only Please.

AiAi mihilak

Nakahilak si Ai Ai delas Alas sa dihang naabot sa venue sa premiere night sa pelikulang My Bebe Love gumikan sa kadaghang tawo. Mapasalamaton siya sa tanang tawo nga nisuporta sa maong pelikula.

Asa si Kris?

Miulbo na pud  ang bashers ni Kris Aquino ug nipadayag kini nga dili kaayo aktibo ang TV host-actress sa promosyon sa pelikulang All You Need Is Pag-ibig  . Sila si Kim Chiu, Xian Kim, Ian Veneracion ug Jodi Sta. Maria lang matud pa ang kanunay nga motambong sa nagkadaiyang kalihukan sa maong pelikula.

AlDub gipistahan sa Youtube

Nakasulod ang pipila ka  AlDub videos sa  top trending videos sa Pilipinas sa  YouTube Rewind 2015. Sa music category, nakasulod sa  Top 10 ang Wish I May music video  ni Alden Richards nga duna’y  3.7 million views sa YouTube.

Gipangandaman gyud

Nagsugod na sila si Richard Gutierrez ug Christopher de Leon sa sword-fight training sa miaging adlaw. Tipik kini sa preparasyon sa umaabot nga programa sa TV5 nga  Panday

Nataypan si Shy

Si Shy Carlos maoy nakaangkon sa title role nga Tasya Fantasya sa TV5. Si Mark Neumann maoy gihugonhugon nga maoy mahimo niya nga leading man sa maong proyekto.

Musunod ni Sharon

Gibutyag ni KC Concepcion nga ganahan ang iyang igsuon nga si Frankie Pangilinan nga mahimong singer busa napanglantawan na niya nga mao kini mosunod sa tunob sa inahan nila nga si Sharon Cuneta."Nakikita ko na mahal na mahal niyang kumanta. She loves composing, singing, playing guitar. I would never want to clip someone's wings. I think everyone deserves to shine if they have the chance. Everyone deserves support and I think the worst thing you can do to a kid is to make her feel like it's a mistake to like to sing or perform,” suma pa ni KC ngadto sa ABS-CBN News.

Nag-abot

Nagkita sila si Robi Domingo ug sa K-pop star nga si Sandara Park didto sa South Korea sa miaging adlaw. Nibakasyon si Robi sa maong dapit uban sa iyang pamilya.

Panglantaw ni Kathryn

Napanglantawan ni Kathryn Bernardo nga mo-click gyud ang tandem nila ni Sofia Andres ug Diego Loyzaga. Puros niya higala ang nahisgutan nga mga artista busa gikalipay niya og maayo sa dihang nasayran niya nga magpares sa usa ka big project sila si Diego ug Sofia sa ABS-CBN.

Kontento

Dili komportable  si Pokwang kung duna’y motawag kaniya nga bag-ong comedy queen. Suma pa sa aktres nga kontento na siya sa positibong reaksyon sa mga tawo kalabot sa iyang pag-arte busa dili na importante kaniya ang titulo.  

Lloydie ang ma-best actor?

Linahi nga pelikula, minos nga katawa apan napuno sa mga kulbahinam nga eksena uban sa mga bulawanong pagtulun-an.

Mao kini ang paghulagway ni John Lloyd Cruz sa gibidahan niya nga pelikula nga “Honor Thy Father” nga entry sa Metro Manila Film Festival.

 “Sinubukan lang namin na mag-try ng bagong tema, at madiskubrehan natin na meron pang  ibang klase na pelikula ang gusto nilang panoorin,” suma pa sa aktor sa dihang nahinabi sa Cebu Entertainment Group (E-Group) atol sa presscon dinhi sa Sugbo nga gidumala ni Josie S. Pereyra sa JSP Ads and Promotions.

Istorya kini sa pamilya nga nagsagubang og nagkadaiyang suliran sa ilang negosyo .

“Sa pelikulang ito, makikita natin na merong klaseng problema na nagpapatuloy pala hanggang ngayon. If makikita mo ang pelikula, malalaman mo na kung paano yan i-handle,” saysay pa ni Lloydie.

Ang Honor Thy Father maoy 2015 MMFF entry sa  sister production outfit sa  Regal Films nga Reality Pictures.

Gipadaplin lang sa ni John Lloyd ang panag-an sa ubang tawo nga matud pa nga posible siya nga ang mahimong best actor sa MMFF karong tuiga.

“Hindi natin iniisip yan, trabaho lang tayo. Mag-enjoy lang sila sa movie, okay na  yun,” matud pa niya. Bisan pa man nga matawag nga seryoso ang maong pelikula, gipasigarbo ni John Lloyd ang Honor Thy Father gumikan kay lahi gyud ang gipakita niya nga katakos niini.

“Masasabi natin, na walang kilig, may mga eksena na hindi ko pa nagagawa noon , “ dugang pa ni Lloydie.

Nalakip  pud sa “Honor Thy Father” sila si  Meryll Soriano, Dan Fernandez, Tirso Cruz III, Khalil Ramos,  Perla Bautista ug ubos kini sa direksyon ni Erik Matti .

Tungod sa maong pelikula nakat-on si Lloydie sa pagamit og pusil ingon man usab pag-welding.  Atol sa presscon, naa usab ang co-star ni John Lloyd nga si Khalil Ramos kinsa proud kaayo nga subli niya nga nakauban ang aktor sa lain na pud nga proyekto.

Kahinumduman nga nalakip si Khalil sa pelikulang A Second Chance.