Alden dali makahilak

CEBU, Philippines - Mapasalamaton si Alden Richards sa GMA-7 gumikan kay epektibo gyud ang pagtambong niya og mga workshop. Usa kini sa rason nga dali na kaayo siya makahilak sa pipila niya ka eksena sa kalyeserye sa Eat Bulaga.

Basta malingaw

Tsika pa ni Maja Salvador, mapuno man o dili ang Mall of Asia Arena sa iyang upcoming concert sunod buwan, gipasalig  niya sa iyang fans nga malingaw gyud sila motan-aw niini. Wala manumbaling si Maja sa iyang kritiko nga mikwestyon sa iyang abilidad sa pagkanta.

Hinay-hinay sa laag

Gibutyag ni James Reid nga mihinay-hinay na siya sa paglaag og mga disco bar gumikan sa kadaghan niya og proyekto. Kever lang si James sa lenggua sa iyang mga kritiko kinsa misaway sa iyang pagkalaagan.

Ella gipanguyaban ni Bret

Giangkon ni Bret Jackson nga nanguyab siya ni Ella Cruz. Padayon gihapon sila nga nag-ilhanay sa usa’g-usa ug masaligon siya nga sugton siya ni Ella. Nagkaila ang duha sukad sila nagpares sa pipila ka programa sa TV5.

Modagan pagka-bise gobernador

Midagan pagka-bise gobernador sa Laguna ang aktres nga si Angelica Jones. Miduso na si Angelica sa iyang certificate of candidacy niadtong Huwebes.

Proud sa uyab

Bisan sa ka-busy ni  Angel Locsin  sa  showbiz, mogahin gyud og oras ang aktor sa pagtambong og mga charity event.  Naandan na kini nga gimbuhaton sa aktres busa proud kaayo kaniya ang iyang boyfriend nga si Luiz Manzano.

Cesar pasok sa Hollywood film

Malipayong gibutyag ni Cesar Montano nga malakip siya sa usa ka Hollywood movie nga himuon sa unang bahin sunod tuig. Ang producer niini mao usab ang naggama sa Hollywood film ni Cesar nga “The Great Raid” niadtong 2005.

Magpabiling higala

Gipasalig ni Heart Evangelista nga magpabilin ang maayong tinagdan nila sa iyang suod nga higala ug iyang mentor nga si Sen. Miriam Defensor Santiago kinsa midagan pagka-presidente. Dili matud pa makaguba ang politika sa ilang panaghigalaay. Midagan pagka-bise presidente ang bana ni Heart nga si Sen. Chiz Escudero apan si Sen. Grace Poe maoy ka-tandem niini.

Gi-request

Giangkon ni Ruru Madrid nga siya mismo ang ni-request sa GMA-7 sa panagpares nila ni Solenn Heussaff sa bag-ohay lang nga episode sa programang Karelasyon. Suma pa sa aktor nga dugay na niya nga crush si Solenn busa dream come true alang kaniya ang panag-uban nila sa proyekto.

Mark mobalik sa Dos

Giangkon ni Mark Bautista nga gihan-ay na karon ang pagbalik niya sa ABS-CBN ug mopirma gyud siya og kontrata niini. Suma pa sa singer nga nahupas og kalit ang iyang career sa GMA-7 sukad nawagtang ang Sunday All Stars busa duna siya’y igong rason sa pagbalik niya sa Kapamilya Network. (Sanden J. Anadia)