Hugyawnatic

Dear Banat hugyaw,

Maayong adlaw sa tanang readers sa  Banat News, ako diay si Reyl ,28 anyos nako ug nagpuyo sa Talisay City.

Minyo nako ug aduna ko’y usa ka anak. Ako lang ipaambit ang love story namo sa akong asawa  nga si Ronelyn,  25 anyos.

Nagkaila mi niadtong college pa ming duha. Ako siya nga schoolmate ug gipaila-ila siya nako sa usa  ka classmate.

Kini si Ronelyn, himarkada kaayo nga babaye apan nakuha gyud niya ang akong atensyon gumikan sa ka talagsaon niya nga kaanyag. Ganahan man gud ko og morena maong naganahan gyud ko niya sulod sa lima ka buwan namo nga panagkaila.

Sipat gamay si Ronelyn , ug usa kini sa rason kung nganong ako siya nga napansin. Medyo nasuod na pud ko sa iyang barkada busa  kanunay na pud ko nga makauban sa ilang pagpanuroy labi na diha sa IT Park.

Nagkasuod mi og maayo ug nakabantay niini ang among mga higala busa naputos gyud mi sa mga sungog.

Sa tinuod lang, kiligon gyud ko, basta sungugon ming duha kay naa na gud ko’y feeling niya daan.

Ambot lang kaha  kung gikilig ba  siya kay igo raman gud siya mokatawa , murag balewala ra niya ba.

Wala ko kaagwanta, ako gyud siya gihagad og date kay ganahan na kay ko musugod og diskarte kaniya.

Sa unang imbitar nako kaniya, wala siya musugot kay gikapoy daw siya , ug kiwawan daw siya maghuna-huna kay magbarkada mi unya makig-date daw ko niya.

Akong giusban og hagad, murag lapas gyud og ka napu ko niimbitar niya og date hangtud nisugot na gyud siya.

Wala gyud ko kalimot sa iyang gisulti niya sauna , ninana siya,” Ngano diay ka Reyl?, okay ra? , mag-barkada ta unya manghagad pa gyud ka og date nga sige naman ta og kuyog sa mga laag, o sige mosugot ko pero karon ra ha!.”

Grabe kaayo akong kalipay sa dihang nisugot siya nga mag-date mi. Didto mi nanuroy  ug nangaon sa Ayala .

Grabe gyud akong pag-istoryahan ug niangkon gyud ko niya nga duna ko’y feelings kaniya.

Igo ra siya mokatawa og maayo hangtud nahuman na lang mi og date, wala gyud siya’y tarong nga response sa akong giangkon kaniya.

Sa tinuod lang palugit kaayo si Ronelyn kay dili daw siya andam mosulod og balik sa usa ka relasyon.

Magsige ko og huwat sa iyang tubag , ug niabot gyud og usa ka tuig kapin ang pagsige nako og diskarte kaniya apan wala gyud siya’y positibong tubag, laktod pagkasulti , gi-basted ko niya.

Nakahuna-huna ko nga mo-surrender lang , ako siya nga giingnan nga dili nako magsamok-samok kaniya ug ako na nga gidawat nga dili gyud ang  ako ang klaseng lalaki nga iyang gipangita.

Wala nami  komunikasyon sulod sa tulo ka buwan  ug hangtud naabot ang adlaw nga kalit siya mipadala og text message kanako ug ganahan siya makigkita nako.

Nahibulong ko ug wala ko’ ideya kung unsa kaha ang tuyo niya kanako, ug niangkon dayon siya nga gimingaw na siya sa akong pagsamok-samok kaniya , sa mga adlaw nga magsige ko og pangulit kaniya. Matud pa niya nga sa dihang wala na me komunikasyon, naka-realize siya nga na-develop na diay siya kanako.  Naa pa ko’y feelings ni Ronelyn sa dihang nagkita mi og balik, busa nanguyab ko niya og balik, sa wala’y paglangan, gisugot ko niya ug dili na siya gusto nga mabuhian pa ko niya.  Naka-graduate mi og college ug nakabaton og trabaho ug nakahukom dayon nga magpakasal. Sa pagka-karon, happy kaayo ming duha isip magtiayon uban sa among anak nga si Andy.  Mo-request diay ko og lyrics sa among favorite song nga Destiny  ni Jim Brickman.

Daghang salamat Reyl sa imong LOVE STORY. Paabuta ugma puhon ug imong gi-request nga lyrics.

Dear Hugyawnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook page: Banat News Hugyaw (BNH) . I-like ang atong page daan, unya i-private message ang imong LOVE  STORY. Mahimo sab nga pinaagi sa snail mail, Ang atong address mao kini:

Love Story c/o Banat News

V. Gullas St. corner D. Jakosalem St.

Brgy. Sto. Niño

6000, Cebu City ,Philippines