Hugyawnatic

Dear hugyawnatics,

Kapaspas sa pagligid sa mga katuigan! Imagine nine years old na kita karong adlawa? Wala lamang damha no? Lab-as pa kaayo sa akong panumduman nga katong una natong isyu, napangulbaan pa gyud ko ato, kay wala ko masayud unsay nagpaabot nga kaugmaon dinhi sa Banat News Hugyaw. Ako pa gyung usa ato? Ako’y musuwat, ako’y mu-edit, ako’y mu-interview! Hahahaha!

Malipayon ko nga hangtud karon, kauban gihapon nato si Bischikador Yuri matag Domingo. Naa sab ang kugihan kaayo nga si Sanden Anadia, nga dakong gasa para natong tanan dear HUGYAWnatics. Medyo masulub-on lang ang atong 2014 gumikan kay nipanaw si Manay Kris Relatado, ang usa sa akong mga mentors gyud dinhi sa local industry, ang nihangop nako sa hingpit niining maong industriya, nagpaila-ila nako sa mga posibling tinubdan sa balita. (Please say a prayer for Manay Kris dear HUGYAWnatics). I hope happy siya wherever he is now.

Sa tuig 2014 atong gipalig-onan og maayo ang atong mga istorya. Mas daghan kita og features. Makapahimuot usab nga inanay na nga gihangop ang atong labing bag-ong kalingawan matag Lunes, ang LOVE STORY. Daghan na gyung magpangita, ug ubay-ubay na sab ang nagpadala sa ilang mga sugilanon sa gugma. Daghan na ang nangangkon nga usa na kini sa ilang mga paborito.

Laumi ninyo nga niining ikasiyam na ka tuig sa atong panag-uban, mas daghan pa nga HUGYAW nga mga sugilanon ug balita nga makutluan ninyo og pagtulun-an ingon man inspirasyon ang atong lutuon alang sa inyong katagbawan. Ayaw usab kamo pagpanuko pagpadangat sa inyong mga hunahuna, tampo ug bisan unsa nga makapalambo pa og maayo sa inyo ug atong HUGYAW!

Salamat sa mga lola nga nipadayag gayud sa ilang kagustuhan nga mubasa og balita sa artista pinaagi sa HUGYAW! Mga lola ug lolo, kun inyong nabantayan mas dagko ug klaro na ang mga letra sa inyong HUGYAW ug Banat News in general. Kamo maoy usa sa rason niini, aron dili na kamo maglisud pagbasa. Sa ngalan sa kinatibuk-ang pwersa sa mga maghuhugyaw, daghang salamat our dear HUGYAWnatics sa wala ninyoy puas nga suporta. Happy 9th kanatong tanan!

Kaninyo mapasalamaton kanunay,

Teofila Unabia, 66 - Minglanilla

Kung mubasa ko og Banat dili gyud na nako malimtan ang pagbasa usab sa Hugyaw kay malingaw man gud ko og basa-basa og mga artista unya daghan pud og news ang Hugyaw may na lang updated ko bisag dili na kaayo ko ilado sa mga batan-ong artista karun.

Nelson Pardillo, 70 - Talisay

• Basahon man jud na nako tanan ang Banat apil na ang Hugyaw naandan na na nako mata’g buntag malingaw ra man pud ko’g basa-basa anang mga artista.

Lourdes Girasol, 62 - Minglanilla

• Para updated pud ko sa mga panghitabo sa mga artista alangan tig tan-awan man pud ko og mga teleserye mata’g gabii dayong ‘tog mao nang apilon nako og basa ang Banat Hugyaw.

Diosdado Canada, 74 - Naga

• Ganahan lang jud ko magbasa2x sa Banat apil na ang Banat Hugyaw nindot man pud ning basa-basahon ang mga estorya sa artista kung wa ta’y lingaw.

Emelda Gerasmio, 60 - Oslob

• Gawas sa mga estorya nga akong mabasahan sa Banat Hugyaw ganahan pud ko kay nakabantay ko aduna pud sila’y recipe nindot kay aduna pud ta’y makuha.

Maria Dejos, 71 - Naga

• Basahon jud na nako ang Banat Hugyaw oy kay bisag tiguwang na ta tig tan-awan man gihapun ta’g TV makuryoso pud baya ta usahay sa mga balita nga mugawas aning mga artista.

George Villeta, 67 - Basak

• Nindot man pud og basahon ning Hugyaw o showbiz news para makahibalo pud ta sa mga panghitabo dili lang kay sa kanang mga seryoso nga news.

Estrella Burgos, 63 - Labangon

• Basahon sad jud nako’g apil ang Banat Hugyaw pampawala sa laay para updated pud ta aning mga artista naanad na man jud mi sa akong pamilya nga mubasa og newspaper mata’g adlaw.

Miguel Campos Sr., 82 - Talisay

• Ganahan ko magbasa-basa sa Hugyaw kay colorful man gud ang showbiz page unya updated pud sa mga artista malingaw ra ko’g basa-basa.

Venturada Moldez, 75 - Guadalupe

• Hilig man jud ko og mga artista bisan sa una pa maong magbasa-basa jud ko og Banat Hugyaw. Usa sa akong paborito mao si Marian Rivera.