“Captain Barbell” ang nakadani kang Aljur!

CEBU, Philippines -  Usa ka showbiz insider ra matud pa ang naggalgal kang Aljur Abrenica nga mulayat paingon sa ABS-CBN hinungdan nga nagtinguha kini nga makabuhi sa iyang kontrata sa GMA7. Ug human wala tuguti sa network sanglit 2017 pa man matapos ang iyang kontrata, nidangop kini sa korte.

Ang istorya mao nga giingnan matud pa si Aljur sa maong showbiz insider nga angayan kaayo kini mudala sa papel nga Captain Barbell nga gikatakdang himuon pag-usab sa telebisyon, pinaagi sa ABS-CBN.

Ang insider nga konektado sa ABS-CBN, namahayag matud pa ngadto kang Aljur nga haom kaayo siya sa role, ilabi na nga nindot kaayo siya og barug. Gihulhugan usab matud pa siya nga angayan niyang hunahunaon nga ang iyang kadungan sa Starstruck nga si Paolo Avelino sikat na kaayo karon human nilayat paingon sa ABS-CBN, samtang siya nabiyaan.

Ang problema lamang matud pa kay bisan og angayan kaayo siya sa role nga Captain Barbell, imposibli nga makuha kini niya sanglit anaa man siya sa karibal nga network.

Dongyan magpakasal karong Disyembre

Karong December 30, 2014 ang kasal nila ni Dingdong Dantes ug Marian Rivera nga himuon sa  Immaculate Conception Cathedral sa Cubao, Quezon City.

Sa report sa Rappler.com, hangyuon nilang duha si President Benigno Aquino III isip usa sa moluhod sa ilang kasal.

Duha ang ilang mga maid of honor nga naglangkob sa mga best friend ni Marian nga sila si Ana Feleo ug  Roxanne Barcelo.

Pang publicity?:Alfie ug Mother Lily nagtinubagay!

Nagtinubagay  ang showbiz columnist nga si Alfie Lorenzo ug ang tag-iya sa Regal Films nga si Mother Lily Monteverde niadtong Huwebes  sa wala pa magsugod ang presscon sa pelikulang Somebody To Love.

Gidungan sa presscon ang birthday celebration ni Mother Lily ug wala damha ang nahitabong tensyon tali nila ni Alfie didto sa Imperial Palace Suites sa South Triangle, Quezon City.

Giingong pag-abot ni Alfie sa venue, gikomedyahan siya sa laing kolumnista nga si Manay Lolit Solis nga basin dili na hinuon moabot si Direk Jose Javier Reyes.

Sa maong pangutana, nitubag si Alfie og, “Alin, yung direktor nilang malas?”.

Kahinumduman nga wala makauyon niadto si Alfie ngadto kang Direk Javier sa dihang nakigsabot kini nga mohimo og pelikula ang iyang alaga nga si Judy Ann Santos apan wala kini mananghid kaniya.

Nakadungog si Mother Lily sa lenggua ni Alfie busa napungot siya og maayo.

“This is my place, don’t do that!.“Bakit mo ba sinasabing malas-malas?,” suma pa ni Mother Lily.

Apan dali nga nigahot si Alfie og ,”Bakit, ano mo ba yung direktor!?” Nanginit ang ulo ni Mother Lily ug nitubag kini og “So what? That’s my decision to get the director.”

Nilenggua dayon si  Alfie og , “Malas talaga siya!”

Nigahot dayon si  Mother Lily og, “You have no right to say that here! Bakit ka nagsasabi nang ganun?  Last time, sinabi mo rin ‘yan sa akin, tiniis ko na lang. You have no right!”. Nisamot kasuko si Mother Lily kang Alfie gumikan kay niabot sa punto nga nilenggua kini nga “pulubi” ang mga showbiz reporters  nga nanambong sa maong presscon.

Human sa pipila ka minutos, gipagawas na si Alfie sa mga security guard  ug nagpadayon og yawyaw niadtong higayona si Mother Lily.

Wala pa ang mga artista sa Somebody To Love sa dihang nahitabo ang maong eksena busa wala kini kalibutan sa nahitabo dihang nagsugod na ang presscon.

Nangayo og pasaylo si Mother Lily sa maong hitabo ug nipadayag nga dako og natabang kaniya ang entertainment reporters sa kalampusan sa mga pelikula sa Regal Films.