Gwapo nga Brazilian guard

CEBU, Philippines- Daan na siya nga nag-trending, apan misamot karong panahona dungan usab sa pag-trending sa World Cup niining bag-o lamang.

Ang Brazilian nga si  Guilherme Leao, giila na karon nga  "World's Hottest Security Guard",  gumikan kay daghan kaayong mga pasahero ang mahugyaw sa kaambongan niya.

Gumikan niini aduna na siya’y 74,000 instagram followers.

Daghang nailad, naglagot ug nagtinanga!

Trending ang sikat nga director nga si Steven Spielberg, gumikan sa hulagway niya nga gi-upload ni  internet humorist Jay Branscomb. Ang hulagway nga gipatik sa http://kickerdaily.com, mao ang litrato sa director diin adunay dinosaur sa likod niini.

“Disgraceful photo of recreational hunter happily posing next to a Triceratops he just slaughtered. Please share so the world can name and shame this despicable man,” caption sa hulagway nga gi-upload ni Branscomb.

Daghang nisaway dayon kang Spielberg ug nipadayag sa ilang kalagot kay ngano matud pa nga gipatay niini ang maong dinosaur.

Nagtuo si Branscomb nga makasabot ang mga tawo nga binuang ra niya ang tanan, apan dako siyang sayop kay giseryoso sa ubang netizens ang maong hulagway. Kini kay daghan na sa mga netizens ang wala nakaila kang Spielberg ug nalimot nga siya maoy direktor sa 1993 blockbuster Jurassic Park. May nanawagan pa nga angayan matud pa nga silutan ang nahisgutan.

Base sa mga komentaryo, tataw nga daghan ang wala nakasabot nga 66 million ka tuig na ang nakalabay dihang may mga triceratops pa nga nabuhi dinhi sa kalibutan.

Nasayran nga ang dinosaur nga naa sa likod ni Spielberg, mechanical prop gikan sa pelikulang nikita og $1 billion ug naghatag niini og tulo ka Academy Awards, niadtong 1993 nga mao ang  Jurassic Park.

Suma pa nikabat na og 10,000 likes,  32,000 shares ug 6,000 comments ang naangkon sa nahisgutang “hateful photos.”

Career ni JM banhawon

Balik showbiz na si JM De Guzman human siya nawagtang sa industriya usa ka tuig kapin. Mi-post si  Direk Wenn Deramas sa iyang instagram og hulagway nila ni JM ug gipahibalo niya nga duna siya’y  proyekto nga ihatag ngadto sa aktor. Kahinumduman nga taud-taud nga nawala si JM sa showbiz gumikan sa problema.