Dili ko maldita

CEBU, Philippines - Gipadayag ni Ms. Philippines -Earth 2014 Jamie Herrell nga dili gyud mausab ang iyang batasan bisan pa man sa bag-ong titulo nga iyang naangkon.

Subling nagpasalamat si Jamie sa tanang Sugbuanon nga nisuporta kaniya sa pagsalmot niya sa maong kompetisyon.

Ang manager ni Jamie nga si Marlon Wafer sa Wafers Modeling Agency nibutyag atol sa press conference nga gihimo sa Taj Indian Restaurant nga nakita gyud ang dakong kalamboan sa pagdala ni Jamie sa iyang kaugalingon.

Unang nadiskobrehan ni Marlon si Jamie sa usa ka Sta. Cruzan ug giingong matam-is nga pahiyom niini maoy usa sa asset sa dalaga.

"Moingon sila nga maldita ko, pero dili man," matud pa ni Jamie.

Nasalmotan na niya ang nagkadaiyang fashion show hangtud nga nisalmot siya sa Miss Lapu-Lapu 2012 ug siya ang napili nga first runner up, ug nahimo usab siya nga finalist niadto sa Miss Resort World Manila. Naabot ang panahon nga napili siya nga Festival Queen 2013 sa Sinulog Festival ug napili nga Reyna ng Aliwan sa Aliwan Festival didto sa kauluhan sa susama nga tuig.

Tsika pa ni Jamie nga dili basta-basta ang iyang naagian sa pagsalmot niya sa Miss Philippines-Earth gumikan kay puros gyud mga lig-on ang iyang katigi niadtong higayona.

Matud pa niya nga positibo lang gyud kanunay ang iyang panglantaw sa mga butang nga ilang buhaton, gani andam siya maminaw og mga sugyot sa iyang mga handler gumikan kay mao kini ang makapalig-on kaniya og samot.

Gibutyag usab sa Cebuana beauty queen nga ang labing suod niya sa tanang kandidata sa pageant mao ang Ms. Dumaguete nga si Kimberly Covert (Ms. Earth Water 2014).

Gikatakdang mobalik sa kaulohan si Jamie sa umaabot nga mga adlaw alang sa iyang responsibilidad isip Ms. Philippines Earth.

Gipaabot usab ang pagtikang niya sa nagkadaiyang dapit sa nasud aron i-promote ang eco-tourism sa Pilipinas.

Sa pagsalmot ni Jamie sa international pageant sa Miss Earth sa hinapos nga bahin karong tuiga didto sa Macau, ipangampanya gyud niya og maayo ang hugyaw nga mga lugar sa Pilipinas.