Lawas ni Rachelle Ann gidayeg

CEBU, Philippines - Gawas sa hugyaw nga tingog, gidayeg usab sa viewers ang sexy body figure ni Rachelle Ann Go atol sa labing unang pag-perform niya isip Gigi sa Miss Saigon sa miaging gabii didto sa Prince Edward Theatre sa London.

Wala matuyo

Gipadayag ni Zoren Legaspi nga mohatag siya og kooperasyon sa Bureau of Internal Revenue ug gitataw niya nga wala siya'y intensyon nga mosupak sa balaod. Kahinumduman nga gipasakaan og tax evasion case si Zoren sa BIR. Matud pa sa aktor nga kung duna man gani siya'y kasaypanan, wala niya kini gituyo.

Ara mabdos

Human napunit ang gisabak ni Ara Mina sa miaging buwan, giingong nagsabak na sad karon ang aktres. Kasamtangang gipapahuway si Ara aron maseguro ang kaluwasan sa umaabot nga anak nila ni Patrick Meneses.

Bong: Prisoha na lang ko!

Gihagit ni Senator Bong Revilla Jr. ang Palasyo nga prisohon na lang siya aron mahuman na ang iyang pag-antos. Kini kalabot sa pasangil nga matud pa nalambigit si Bong sa pork-barrel scam.

Tungod sa ka-busy

Dili madayon ang pag-uli ni Ryan Bang sa South Korea ugmang adlawa gumikan kay napuno karong panahona ang iyang showbiz commitments.  Ugma ang Mother's day busa gusto unta ubanan ni Ryan ang iyang inahan apan dili na gyud madala sa iyang schedule.

Ranier mobalik sa GMA?

Gidungog nga mobalik si Ranier Castillo sa GMA-7 human wala ma-renew ang iyang kontrata sa TV5. Nasayran nga taudtaud na nga nahilom ang career ni Ranier.

Imbitasyon giisnab ni Marian

Wala makatambong si Marian Rivera sa art exhibit ni Heart Evangelista niadtong Huwebes. Kahinumduman nga personal nga gitunol ni Heart ang invitation card ngadto kang Marian sa set sa Sunday All Stars. Giingong dunay laing lakaw si Marian busa wala kini makatambong sa maong kalihukan.

Commissioner Dingdong

Nagbaha ang mga pahalipay nga nadawat ni Dingdong Dantes human siya gitudlo ni Presidente Noynoy Aquino isip bag-ong commissioner sa National Youth Commission. Ang kaaktibo sa aktor sa mga maayong programa alang sa kabatan-onan maoy usa sa gibasehan sa pagkatudlo ni Dingdong sa maong puwesto.

Kylie gikapoy ni Aljur?

Nakabalik na sa Pilipinas si Kylie Padilla sa miaging adlaw apan naglikay kini sa paghisgot sa pangalan ni Aljur Abrenica. Gidungog nga nagbuwag sila si Kylie ug Aljur human na-link ang aktor ngadto kang Louise delos Reyes.