Made in the Philippines

CEBU, Philippines - Gipatukar na sugod kagahapon ang bag-ong single ni Ane Curtis nga Made in the Philippines sa pipila ka radio stations sa United Arab Emirates, United Kingdom, Europe, ug Hong Kong. Ipatukar na usab ang maong kanta didto sa Australia karong April 1.

Misuporta ang kanhi uyab

Gipadayag ni Phil Younghusband nga ganahan siya nga magmalipayon ang iyang ex-girlfriend  nga si Angel Locsin busa usa siya sa nisuporta sa panagbalik sa aktres ug sa aktor nga si Luis Manzano.

Mother Lily mosulod sa politika?

Gihugon-hugon nga  matud pa nagplano si Mother Lily Monteverde nga mosulod sa politika karong 2016. Giingong usa ka posisyon didto sa Taal, Batangas ang target ni Mother Lily busa ganahan na kini nga magpa-rehistro sa maong dapit.

Karaang isyu

Tsika pa ni Marian Rivera nga karaan na kaayo nga isyu nga matud pa nga arte siya nga pagka-artista. Nagkanayon ang aktres nga igo na lang siya mokatawa sa higayon nga magbalik-balik ang maong istorya sanglit dili man kini tinoud.

Alwyn nagtoon og boxing

Tsika pa ni Alwyn Uytingco nga tulo ka buwan siya nikuha og basic training sa boxing sa wala pa siya nagsugod sa taping sa programa niya nga Beki Boxer sa TV5. Matud pa sa aktor nga daghan gyud siya og nakat-onan ug gamit kaayo kini sa bag-o niya nga show.  

Hugyaw ra Solenn!

Ang pelikulang Da Possessed maoy unang pelikula ni Solenn Heusaff sa Star Cinema busa dakong garbo alang kaniya nga mataypan sa maong movie outfit aron himoong leading lady ni Vhong Navarro. Nalakip usab sa maong pelikula sila si John Sweet Lapus, Empoy, Smokey Manaloto, Beverly Salviejo, Lito Pimentel, Joy Viado, Matet De Leon, Aaliyah Belmoro, ug Joey Marquez.

Ruffa magpa-stem cell

Mosakit og kalit ang likod nga bahin sa lawas ni Ruffa Guttierez busa nagplano karon ang aktres nga mopaubos sa stem cell therapy. Suma pa ni Ruffa nga usa sa rason nga manakit ang iyang kalawasan mao ang  kanunay niya og sul-ob og sapatos nga taas og tikod.

Suod sa mama sa boyfriend

Gikatahong nag-bonding dili pa lang dugay sila si Maja Salvador ug ang inahan sa iyang boyfriend nga si Gerald Anderson. Nasayran nga nitikang si Maja sa General Santos City alang sa usa ka show busa nakahigayon ang aktres sa pakighimamat sa inahan ni Gerald nga si Mommy Evangeline.

Makisig ulitawo na

Nakugang ang fans ni Makisig Morales sa dihang gianunsyo niya nga mitungtong na diay siya karon sa kolehiyo ug gikuha niya ang kursong

 Business administration. Matud pa ni Makisig nga ang pagtungha maoy iyang gibisihan sa dihang taud-taud siya nga nawala sa showbiz. Mibalik na karon si Makisig sa pag-arte pinaagi sa seryeng Mirabella.

Ka-sweet naman lang

Gipadalhan ni Ryan Agoncillo og mga buwak ang iyang asawa nga si Judy Ann Santos sa set sa programang Bet on Your Baby sa dihang nasayran niini nga naglain ang lawas sa aktres apan padayon gihapon kini nga nitrabaho. Gisungog pag-ayo si Juday sa mga staff sa iyang programa.

Heart ug Daniel nag-abot

Mikawat og eksena ang panagtagbo sa kanhi mag-uyab nga sila si Heart Evangelista ug Daniel Matsunaga sa usa ka kalihukan sa giindorsar nila nga produkto.  Giklaro sa duha nga wala sila magdinumtanay busa nagtagad gihapon sila sa ilang panagkita sa maong event.

Rhodora X patas-an

Gikatahong i-extend og duha ka buwan ang serye ni Jennylyn Mercado nga Rhodora X sa GMA-7 gumikan sa mga  positibong feedback niini gikan sa viewers.  Ang maong serye maoy reunion project nila ni Jennylyn ug Mark Herras.

Naghuwat og offer

Nalingaw na si Hilda Koronel sa iyang pagpuyo sa Amerika ug mobakasyon lang siya dinhi sa Pilipinas kung dunay proyekto nga itanyag kaniya. Katapusang nakita si Hilda sa pelikulang The Mistress niadtong 2012. (Sanden J. Anadia)