Magic 92.3 Magicians on Air!

CEBU, Philippines - Pormal na nga gipaila-ila sa publiko ang labing bag-o nga FM station sa Sugbo, ang Magic 92.3 nga maoy gihulip sa Killer Bee. Ug karon niining bag-o na nilang ngalan, panganti sa pwersa luyo sa maong istasyon nga mas mag-agresibo sa ilang mga programa ug aktibidad aron pamatud-an nga sila pa gihapon ang “event’s station” nga maoy nagpasikat kanila kaniadto.

Ang station manager sa Magic nga si Jossein Delfinado nisaysay ngadto sa mga tigbalita nga susama ra gihapon ang mga disc jockey sa Killer Bee ang madungog sa Magic.

Matud pa niya nga igo ra nga giusab ang pangalan apan magpabilin  ang pagpatukar sa mga bag-ong kanta sanglit contemporary hit radio (CHR) man ang ilang format.

Dugang pa ni Delfinado nga kinabag-an sa ilang mga listeners nagpangedaron og 13-21 anyos busa mga high school ug college students kini. Aduna pu’y maminaw nila nga mga young professionals.

Ang istasyonan nga Magic 92.3 gibase sa pangalan sa ilang istasyon didto sa kaulohan nga maoy ilang mother network.

“Hagbay ra man gyud ang plano,  nag-agi og pila ka meetings ang mga station managers ug nagkasinabot nga ipareha na lang pangalan station,” suma pa ni Delfinado kinsa nisaysay usab nga moabot na ngadto sa walo ka Magic radio stations tibuok nasud

Padayon gihapon nga mabati matag gabii ang Boys Night Out nila ni  Slick Rick, Sam YG, ug Tony Toni. Ang sikat nga trio on air, gipaabot nga muanhi sa Sugbo sunod buwan, busa kinahanglan lamang nga maminaw kanunay sa estasyon alang sa libre nga tickets alang niining maong okasyon ug sa uban pang mga parties nga muabot nga pasiugdahan sa Magic 92.3.

Mapasigarbuhon usab nga gipahibawo sa Magic 92.3 nga madungog na matag Huwebes (3-7pm) ang American Top 40 sa bantugang host sa American Idol nga si Ryan Seacrest.

Samtang ang assistant provincial director sa Magic 92.3 nga si Jerome Calatrava nisaysay nga agresibo karon ang Magic 92.3 aron mailhan sila pag-ayo sa katawhan.

Aduna sila’y mga programa nga ipahigayon sa nagkadaiyang establisamento sa Sugbo ingon man usab sa mga unibersidad.

Mohimo usab sila og nagkadaiyang promo aron usab magsadya og maayo ang ilang listeners.

Dugang pa ni Calatrava nga wala gyud nga hingpit nga nakig-kompetensya ang Magic 92.3 ngadto sa masa nga station.

Matud pa niya nga aduna sila’y tagsa-tagsa ka mga target audience busa dili  maapektohan kung dunay ipagawas nga mga survey.

“Ang amo lang nga ma-maintain namo ang among listeners,” suma pa ni Calatrava.

Napuno sa musika ang kasagaran nga mga programa sa Magic 92.3  gumikan kay mao man gyud kini ang sentro sa ilang paglawig sa kahanginan.

Nagmalaumon ang kinatibuk-ang puwersa sa Magic 92.3 nga pabilin sila nga hangpon sa publiko sama sa nadawat nila nga suporta sulod sa 21 ka tuig nga nagdala sila sa ngalang Killer Bee. (Sanden J. Anadia)