Attitude nga reporter!

Sumsuman sa mga kauban niyang reporter kagahapon kining usa ka tigbalita nga matud pa namalikas   didto sa usa ka airport gawas sa Sugbo.

Ang istorya matud pa mao nga wala giapil pagbutang sa maong tigbalita ang iyang belt bag sa x-ray scanner sa maong tugpahanan hinungdan nga gitawag ang iyang attention. Napungot matud pa ang maong reporter nga gisita siya ug milenggua  og: “ Pi**e gibakus na nako.” Maayo na lang matud pa kay wala manumbaling ang guard nga buotan matud pa og dagway.

Suma pa nga ang mga kauban sa maong reporter igo na lamang nga miduko gumikan kay sila maoy nauwaw para sa nahisgutan. Gawas sa pag-attitude ni reporter didto sa airport, nahugyaw pud matud pa ang iyang mga kaubanan gumikan kay giitsa niini ang bayad sa ilang giinom nga kape ngadto sa cashier sa usa ka tindahan og donut.

Usa sa iyang mga kauban nangutana nganong iya pa gyung gi-itsa ang bayad ug igo lang matud pa kini nga mitubag og, “ganahan lang ko.” Igo na lang matud pa nga miduko ang iyang mga kauban   sa kauwaw sa eksena nga gimugna sa maong tigbalita. Kung pwede pa lang nga dili na nila kini pakuyugon sa ilang sunod nga lakwatsa, pero nakapa-reserve na matud pa sila og ticket alang sa sunod nilang rampa, kuyog ang maong tigbalita.

Samtang kun kagahapon siya gisumsuman sa iyang mga kaubanang tigbalita, sa ilang estasyon mismo hagbay ra siyang gihisgutan sa iyang mga kaubanan gumikan kay sa ka bag-o pa lang niya sa newsroom hawron-hawron na matud pa ug dili makamao nga murespeto sa iyang mga kaubanan. Nagsalig matud pa ang tigbalita nga pinangga siya sa iyang labaw. Kasagaran sa iyang mga kaubanan nag-isip niya nga dakong sipsip ug kusog mupalapad sa papel. Dugang pa niana, ang mga tawo nga nakatabang niya, iyang giduot paubos ug gidaot sa talikod. Makausa nanluspad matud pa ang maong tigbalita dihang gisukmatan sa usa sa ilang mga cameraman  nga wala sila makauyon nga kuhaon niini ang ilang mga video footage ug ipasa ngadto sa katigi nila nga website. Nahilom matud pa ang maong tigbalita.

Kinsa ang maong reporter? Bag-o pa lang sa industriya pero nagdali nga musikat bisan wala pay napamatud-an. Dili kapamilya, dili pud kapuso! Tuara!

Kapuso star ganahan sa Be Careful With My Heart

Dili na gyud mabangbang ang popularidad ni Richard Yap nga nailhan usab sa kadaghanan isip “Sir Chef” sa seryeng Be Careful With My Heart sa ABS-CBN.

Mismo ang Kapuso star nga si Chariz Solomon ang miidolo kang Richard ug nagpahulagway gyud siya niini sa dihang nagkaabot ang duha sa usa ka event dili pa lang dugay. Suma pa nga bisan pa man sa kadaghang fans nga nagtapok ni Richard , apil si Chariz sa mihugop gumikan kay molantaw gyud siya kanunay sa Be Careful With My Heart gumikan sa kanindot sa istorya niini.

Mitumaw usab ang taho, nga ubay-ubay nga mga Kapuso stars ang nagpakuha og hulagway sa maong Kapamilya actor apan dili sila magpahingalan.

Usa na lang ka Fil-Am  ang nahibilin sa AI

Gipaneguro sa  Filipino-American finalist sa American Idol nga si  Adriana Latonio nga hatagan gyud niya og dungog ang Pinoy sa nahisgutang  reality singing competition.

Kini subay sa pagkatagak sa maong show sa laing duha ka mga Fil-Am nga sila si Bridget Hermano ug Bryant Scott Tadeo.

Sa iyang  Twitter account,  gibahaan og mga mensahe si Adriana gikan sa iyang mga  supporters nga naghatag og kusog kaniya aron maisa ang bandera sa Pilipinas sa maong kompetisyon.

Gipasalig usab ni Adriana nga buhaton niya ang tanan niya nga mahimo aron lang gyud nga layo ang iyang maabtan sa American Idol.

Todo pangandam na karon sa Adriana  sa rehearsals alang sa sunod nga round sa American Idol karong Huwebes.

"Relaxing and ready for another day of rehearsals tomorrow!"  tweet  pa ni Adriana.

Justin gi-boohan  sa iyang fans

Gisinggitan og “boo” si  Justin Bieber sa iyang mga fans  human kini na-late og duha ka  oras sa iyang concert sa O2 Arena sa London.

Matud pa sa report, alas-8:30 sa gabii ang  schedule sa concert ni Justin apan 10:30 sa gabii na kini niabot.

Dili na mahulagway ang hitsura sa mga fans ni Justin gumikan sa kapungot ug ang uban niini nanguli na lang gumikan kay gilaay na og hinuwat sa ilang idolo. Samtang nangayo og pasaylo si Justin ngadto sa iyang fans ug nibawi siya pinaagi sa hugyaw niya nga performance. "Justin Bieber is now on stage and apologises for the lateness of his show. Sorry to all the Justin Bieber fans for the lateness of his show tonight. The Tube will still be running when the show finishes," tipik sa mensahe nga namantala sa official Twitter  account sa O2 Arena.