Sinulog Idol Launching Mabulukon, Lingaw, Hugyaw!

CEBU, Philippines - Nagmaya ang 12 ka finalists sa  Sinulog Idol 2013 nga nagsugod niadtong Biyernes sa gabii  gumikan kay wala’y natagak kanila.

Ang labing nagmalipayon mao ang napili nga Star of the Night nga si Hannah Mariee Rondez gumikan sa hugyaw niya pag-awit sa kanta nga gipasikat ni Lani Misalucha, Bukas Na Lang Kita Mamahalin.

Pagsugod pa lang og birit ni Hannah, nagsiyagitay na ang mga tawo gumikan sa  kanindot sa iyang tingog ug misamot ang pag-abiba sa mga tawo kaniya sa dihang nakuha gyud niya ang taas nga bahin sa maong kanta.

Ang format niadtong gabhiona mao ang “Idol’s Choice,” buot pasabot mao nga sila maoy nagpili sa ilang pisa, busa nagkalain-lain nga genre ang nagdunggan sa audience gikan sa mga finalists.

Apan sugod kagabii, gipatuman na ang pagsunod og tema, diin ang organizer na maoy mubuot sa genre.

Mismo ang  usa sa mga hurado nga si Center for Pop-Cebu branch manager Jay Unchuan ang nakauyon sa performance ni Hannah.

“Golden voice, I particularly like the song you delivered, dagko kaayo mo og transformation, na feel nimo ang song, utilize the stage, powerful kaayo ka’g tingog,” komento pa ni Unchuan ngadto kang Hannah.

Gipadayag usab  ni Unchuan nga wala sila’y gitagak niadtong Biyernes gumikan kay gusto pa nila makita ang ikabuga sa  mga finalists.

“First night pa man tu, so tagaan nato sila og chance.  Gaagi gyud mi og grabe nga deliberation ug discussion maong nahuna-hunaan namo nga wala’y itagak,” suma pa ni Unchuan.

Samtang si Hannah mibutyag dinhi sa Banat News Hugyaw nga tungod kay siya ang napili nga Star of the Night, nahagit siya og maayo nga mapadayon ang hugyaw niya nga performance sa sunod niya nga pag-awit sa entablado.

Kasamtangang nagtungha si Hannah sa University of San Jose Recoletos sa kursong BSBA Financial Management (3rd year).

“Wala gyud ko magdahom nga mahimo ko nga Star of the Night, kay puros man gud nindot ang ubang finalists. Akong gibuhat kay nag-pray ra gyud ko nga matarong nako ang akog performance,” saysay pa ni Hannah.

“Dugang pa ni Hannah nga gibuhat niya ang tanan niya nga  best didto sa entablado ug dako ang iyang  pasalamat ngadto sa iyang pamilya  ug mga higala  nga supportive sa pag-apil niya  sa Sinulog Idol. Katigi ni Hannah sa Top 2, ang pambato sa UC-Mambaling nga si Junrey Rosales Tumong, kinsa paglugwa pa lamang sa entablado gi-abibahan na og maayo sa mga tawo sanglit nindot kaayo ang iyang register sa big screen.

Giawit ni Tumong ang Man Who Can’t Be Moved sa The Script. Lenggua pa sa production staff sa GMA-7 Cebu nga  Gleven Boiser kinsa mitan-aw sa SI, kabahin ni Tumong:  Siya akong bet... his total packaging is so manly and sexy. Naa sya’y star quality for me, he looked good on screen. Paglugwa pa lang niya ni twinkle twinkle na akong eyes. Final na, siya na! I thought siya ang mahimong star of the night pero deserving ra sad si Hannah Rondez.”

Unang hugyaw nga performance mao ang kang Cherish Cartabala nga rendition sa Kung Iniibig Ka Niya, diin labihan ka lanog sa pakpak ug abiba gikan sa mga mitan-aw, ang nadawat niini. Samtang laing gi-abibahan og maayo mao si Sheilla Lopez, dihang nasud-ipan siya human may misulod nga insekto sa iyang pagbirit. Makatulo siya mihunong pagkanta, sanglit giluk matud pa kaayo iyang tutunlan. Pero, bisan pa man sa iyang nahiaguman, naabot ni Lopez ang tag-as nga nota sa awit nga One Moment In Time.

Dili   lalim ang malakip sa maong contest sanglit kada adlaw ang ilang rehearsal ug matag gabii dunay matagak nga usa ka finalist, hangtud nga unom na lang ang mahibilin ug maoy magkumbati og maayo sa grand finals karong Enero 17 diha sa Fuente Osmeña Circle.

Nahugyaw usab ang audience sa opening number sa Sinulog Idol 2013 sanglit milugwa ang mga kanhi idols nga  napili sukad sa pagsugod sa maong indigay, upat na ka tuig ang milabay.

Una na nga gipadayag sa project director sa maong kalingawan nga si Gloria Villarojo nga hugyaw gyud ang konsepto nila karong tuiga gumikan kay pang-musical variety show ang dating niini nga susama sa ASAP Rocks sa ABS-CBN ug Party Pilipinas sa GMA-7.

 Sila si Fidel Cascabel, host sa Kapamilya Mas Winner Ka sa ABS-CBN Cebu ug finalist sa unang season sa Sinulog Idol ug si Gem Felicilda, finalist sa milabay nga tuig maoy mga main hosts sa unang gabii sa kalihukan. Miabag pud isip segment hosts ang tulo ka Sinulog Idol champions nga sila si Jacqueline Chang, Rae Faelnar, ug Ronna Lofranco.

Ang resident judges naglangkob nila ni Banat News Hugyaw editor Ryan Mark, ex-Pinoy Dream Academy scholar Apple Abarguez ug Unchuan.

Ang Sinulog Idol nga gipanag-iya sa Sinulog Foundation Inc., giduma sa Soundtraxx Production sa magtiayong Gani ug Gloria Villarojo.