Atty. Bañoc muhawa sa TV5

Kutob na lamang karong Disyembre niining tuiga ang pag-anchor ni Atty. Ruphil Bañoc sa banner newscast sa TV5 Cebu nga Aksyon Bisaya matag hapon.

Dungan niini, ang usa sa mga reporters sa maong news program nga si Arnold Bustamante, kutob na lamang usab karong adlawa, ug mu-epekto na ang iyang resignasyon ugma puhon, November 1.

Usa ka kasaligang tinubdan sa Banat News Hugyaw mitug-an niadtong Lunes nga naggumikan kini sa paglusad na sa TV5 sa ilang local nga estasyon sa radyo karon November 12.

Suma pa nga gipapili sila si Bustamante ug Bañoc tali sa Radyo5 ug dyHP, gumikan kay palisiya matud pa sa Kapatid Network nga “exclusive” ang ilang mga talents. Buot pasabot mao nga kung konektado sila sa telebisyon, kinahanglan nga sa estasyon sa radyo ra pud sila sa network mualagad.

Apan sama sa gipaabot, mas gipili gyud nila ni Bañoc ug Bustamante ang dyHP nga iyaha sa Radio Mindanao Network (RMN) busa mi-resign na matud pa sila, dugang pa sa tinubdan sa Banat News Hugyaw.

Malilong

Dungan niini, ang tinubdan sa Banat News Hugyaw mibutyag nga duna nay giandam nga hulip kang Bañoc ang TV5 isip news anchor sa Aksyon Bisaya. Siya mao ang manlalaban ug kolumnista nga si Atty. Frank Malilong, kinsa produkto sa University of the Visayas ug reporter sa The Freeman Newspaper.

Bag-o

Samtang sugod niadtong October 1, bag-o na ang news head sa TV5 nga mao si Rosemarie Holganza-Borromeo. Si Borromeo, mihulip  Ramil Paican, kinsa mibalik sa dyRC Radyo Calungsod isip news manager.

Niadtong September, milingkod pud ang bag-ong station manager sa TV5 nga si Karla Kintanar-Fernandez, isip hulip kang Yoli Gendrauli nga mao na karon ang administration head sa maong estasyon... Ryan Mark

Pahumot ni Robert

Si Robert Pattinson ang labing bag-ong endorser sa fragrance line sa French fashion house Dior. Mipirma na matud pa siya og kontrata kantidad og $12 million ug gitakdang ilusad na isip brand ambassador.

Nanobra ang gym

Gumikan kay labihan na niya ka maskulado karong panahona, giangkon sa singer nga si Robbie Williams nga naglisud na hinuon siya og pangita og sapot nga musakto niya. Diha man gud matud pay panahon nga na-ungo siya og workout.

Nakat-on si Susan

Nakat-on na matud pa si Susan Boyle unsaon pag-amoma ang iyang kabantugan. Si Boyle  nga misikat og kalit human mi-audition ug nahimong finalist sa Britain’s Got Talent adtong 2009 miangkon nga lisud matud pa dumalahon ang dali nga pagsikat, apan karon maantigo na siya.

Diva miangkon na sa relasyon nila ni Steven

Opisyal na nga giangkon ni  Diva Montelaba  ang tinagoang relasyon  nila sa ka- batch mate niya sa Starstruck nga si Steven Silva.

Matud pa niya nga kapin sa usa ka tuig na nga opisyal ang ilang relasyon apan nagsugod  ang espesyal nila nga pagtinagdanay sa dihang nagsugod pa lang sila sa Starstruck.

Suma pa niya nga maong dugay niya nga giangkon gumikan kay  ganahan gyud unta siya nga mahimong pribado ang ilang relasyon.

“Masaya kasi kami pag private yung life namin—I mean, yung lovelife namin. Masaya kami pag kami-kami lang mga close friends... ganun. Kasi masaya talaga,” suma pa ni Diva ngadto sa PEP.

 Malipayon karon ang aktres gumikan kay  makita siya sa duha ka mga programa sa GMA-7,  ang  serye nga Aso Ni San Roque ug  Sunday musical-variety show nga Party Pilipinas.

“Kuntento naman ako sa nangyayari sa career ko, pero I’m still praying for more.Pero alam ko namang step-by-step.Masaya naman ako dahil kahit paano, hindi naman ako nawawalan ng work... ng soaps,” nagkanayon ang Sugbuanon  nga aktres.  (BANAT)