Number One Sa Imong Dughan

CEBU, Philippines - VATSKI: Maayong adlaw, Gar, ug sa tanang mga loyalist sa Banatanay! Humana gyud ang filing sa certificate of candidacy last week, ug sugod karon, andam-andam namo sa mga mamukaw ninyu buntag sayo kay maglumba na ni sa ilang mga recureda ning atong mga kandidato. Ana sila ka-excited no? hahaha! 

Anyway, nangharos gihapon ang Kapuso Network sa bag-o lang nga girelease nga ratings sa AGB Nielsen (September 28-Oct.1). Sa daytime nga mga programa, walo gyud ang nasud gikan sa GMA 7 ang nasud sa top 10. Nanguna syempre ang Eat Bulaga! with 23.3%. ug wa sab pauwahi ang “Sanay Ikaw Na Nga” ug uban pang mga salida sa adlawan. Bongga gyud ning GMA, kay napadayun niya ang iyang pagka-numero uno!

GARRY: Kumusta kamong tanan? Alegre gyud kaayo sa milabayng semana sa filing of Certificate of Candidacy kay all star cast gyud ilabi na kadtong mga artista midagan karong umaabot piniliay. 

Pero, wala pa ang eleksyon, miingon na dayon ang uban sila na ang modaog sigun sa ilang resulta sa survey. Mao ra pud aning GMA sa ilang programa nga moingon sila nga number one ug na-una sila? Ambot kinsa kaha ning survey ilang gi-basehan. Naglibog gyud ko kung ikapila ang Walang Hanggan sa survey kay wala mani masulod sa survey sa GMA. 

Kaha, wala mi-lead sa survey ang Walang Hanggan nga talk of the town man gyud ni. 

 VATSKI: Di ka kaingun nga botbot ra na, Gar, kay hasta sa gabii nanguna man gihapon ang maong network sa primetime, diin pito sa napulo ka mga salida gikan sa iyang tugkaran. Nanguna sa listahan ang “One True Love” with 28.3%. Gilupig niini ang “Walang Hanggan” sa ABS-CBN nga nakakuha lang og 25.1. ang “Luna Blanca” ug “Aso Ni San Roque” nasud pud sa top 5. Dili na gyud na malalis nga numero uno ang GMA 7! 

GARRY: Vatski, patouha imong kaugalingon. Suma gud unsa man ang pirmi istoryhan sa mga tawo, ang Princess and I, Walang Hanggan ug tanang ABS-CBN soap. Ambot lang kaha kinsa na ang nag-survey niini. Kung ipamaagi pa nato sa piniliay, modaog gyud ang ABS. 

Anyway, good luck sa tanang candidates ilabi na sa akong amigo nga magpapili pagka mayor sa Tabogon ug sa Tudela. 

Pangutana: Ang ABS-CBN kliyente sa Kantar Media TNS ug ang GMA-7 sa AGB Nielsen. Ang duha ka networks nangangkon nga number one sila, pero kun walay survey, ug kamoy pangutan-on, unsa man gyud nga estasyon ang nag-una diha sa inyong dughan? Ngano man?

Itext ang imong tubag, kauban sa imong ngalan ug address ngadto sa :0917-904-7513. Kutob lamang karong udto (12 noon, October 8), ang pagdawat nato sa inyong mga mensahe ug kinahanglan nga usa lamang ka sentence o dili taas ang inyong tubag aron mapatik. Text text text na.