"Kuyog sa Duyog" sa UV Chorale

Mupasundayag karong alas singko sa hapon (5pm, September 5) diha sa SM Northwing ang nabantog na kaayong UV Chorale isip patilaw sa masaksihan sa nagkadaiya nilang performances sa ilang salmutan nga choral competitions sa nagkadaiyang bahin sa Europe sunod buwan ug karong Nobiyembre. Gitakda usab sila nga mubisita sa Rome ug mupasundayag sa usa sa gilatid nga mga kalihukan paingon na sa canonization ni Beato Pedro Calungsod.

Gi-ulohan og “Kuyog sa Duyog” ang UV Chorale mupaambit sa ilang talento ug musika ngadto sa publiko nga libre alang sa tanan.

Dungan niini, nasayran nga ang UV Chorale ang labing una ug bugtong Sugbuanong choir nga gidapit nga makigtigi alang sa nagkadaiyang choral competitions didto sa Europe. Tataw nga usa kini ka dakong garbo ug kahigayonan aron musulbong ang Sugbuanong talento nga magmontar sa Sugbo ug sa Pilipinas sa kalibutanong mapa sa kabantogan.

Apan kay halayo man ang ilang sulngon nga indigay, nanginahanglan kini og igong kantidad aron mahatagan og katumanan ang nahisgutang katuyuan. Gumikan niini nanuktok ang UV Chorale sa tanang mga Sugbuanon nga may malumo nga kasingkasing nga abagan sila sa panginahanglanong pinansyal. Ang suporta alang sa pagpalambo ug pagpakaylap sa Sugbuanong talento mahimong ibubo pinaagi sa Gcash, usa ka “micro payment feature” alang sa Globe ug TM subscribers.

Aron makatabang, irehistro ang inyong Globe ug TM simcards ngadto sa Gcash service pinaagi sa pagdial og *143# ug pilia ang GCash. Kun rehistrado na, ipa-convert ang imong cash ngadto sa Gcash pinaagi sa Cash-in system sa nagkadaiyang retail stores sama sa Prime Asia branches, Villarica Pawnshops, Rural Bank of Bogo and Katipunan, Globe Telecom ug uban pang Gcash authorized outlets. Text DONATE (space)AMOUNT (space) MPIN (UV_Chorale) ug ipadala sa 2882. Example: DONATE 500 1234 UV_CHORALE send to 2882.

Mahimo usab nga mutabang direkta sa UV Chorale pinaagi sa pagtawag kang Marvin Mantalaba sa University of the Visayas sa telepono (032) 416-8826 ug 0905-410-4289.

Ang UV Chorale nga nabantog sa gawas sa nasud giumol niadtong 1999 ni University of the Visayas Executive President Jose “Dodong” R. Gullas, kansang tumong mao ang paghatag og full scholarship ngadto sa mga tinun-an nga may talento sa musika, ilabi na pag-awit. Sukad sila namugna, nagkadaiyang pasidungog na ang ilang nadawat dinhi sa nasud sa nagkadaiyang dapit sa kalibutan.

Usa na niini ang “AningDangal Award” o “Harvest of Honors” niadtong 2010 gikan ni kanhi Presidente Gloria Arroyo. Usa kini ka pasidungog nga alang lamang sa “exemplary Filipino Artists.” Sila usab ang midaog sa 4th MusicaFeuropa niadtong Abril, ang bugtong choral competition dinhi sa Pilipinas nga suportado sa Europian Union.

Alessandra hulipan ni Glaiza

Miulbo ang balita nga matud pa gibalibaran ni Alessandra de Rossi ang iyang karakter sa pinoy version sa Temptation of Wife sa GMA-7.

Ang maong serye gibidahan nila ni Marian Rivera, Dennis Trillo ug Rafael Rosell.

Giingong padayon nga gituman ni Alessandra ang taud-taud na niya nga prinsipyo nga dili gyud mohimo og love scene ug kissing scene sa iyang mga proyekto.

Suma pa sa tsika nga hulipan na lang si Alessandra ni Glaiza de Castro aron makompleto na ang mga bituon sa maong proyekto

Giingong nag-ilis na lang sila si Glaiza ug Alessandra sa ilang mga papel sa nagkalain-lain nila nga proyekto. Gikatahong si Glaiza unta ang makauban nila ni Dingdong Dantes ug Kylie Padilla sa seryeng Haram, apan gihatag na lang kini ngadto kang Alessandra.

Rich niangkon na !

Giangkon ni Rich Asuncion nga nagkauyab sila kaniadto ni Ervic Vijandre apan wala kini maabot og usa ka buwan gumikan sa iyang ka-busy.

Trabaho dayon

Dili gyud mabakantehan og trabaho si TJ Trinidad gumikan kay human sa serye nga Makapiling Kang Muli, malakip gihapon siya sa programang mohulip niini nga Aso Ni San Roque.

Ciara nasakitan gihapon

Tsika pa ni Ciara Sotto-Oconer nga hangtud karon padayon siya nga nasakitan ingon man usab ang iyang mga igsuon sa mga negatibong komento nga nadawat sa iyang amahan nga si Senator Tito Sotto human naisyu ang iyang speech kalabot sa Reproductive Health bill nga giingong sinundog gikan sa laing manunuwat.

Maja natagam na gyud

Tsika pa ni Maja Salvador nga wala gihapon siya’y plano nga makigbalik sa iyang ex-boyfriend nga si Matteo Guidicelli bisan pa man nga nitagad na kini ngadto kang Coco Martin.