Unforgettable Borgie

CEBU, Philippines - Nagpadayon ang usa ka buwan nga kasaulogan sa nag-unang lifestyle show sa Central Visayas ang MagTV Na sa ABS-CBN, diin labing daku nila nga pahugyaw mao ang “house makeover” sa bulahang viewer.

Nagsugod upat na ka tuig ang milabay, ang MagTV unang gilangkuban og upat ka hosts, sila si Erwin Lim, Charlene Go, ug Blinky de Leon. Nawala sa eksena si Charlene ug misulod si Inday Tikay. Mihunong si Inday Tikay gumikan sa uban pa niyang kabilinggan ug nasulod sa maong pamilya sila si McBilly Sy ug Phoebe Fernandez. Duha ka tuig na ang milabay dihang nanamilit si McBilly sa maong programa hinungdan nga nagpahigayon og Search for the Next Ka Mags ang nahisgutang show. Migawas nga mananaug niini sila si Borgie Cabigas ug Dan Harry Genson. Sa milabay nga tuig, nanamilit si Dan Harry, hinungdan nga misulod sa eksena si Jonathan Cimafranca. Ug niining bag-o lang mibiya pud sa show si Blinky. Nagsugod sa tulo ka hosts, napun-an ug naibanan. Ug sa paglabay sa upat ka tuig, nahibalik sila sa upat lang ka hosts. Busa angayan lang nga atong tagsa tagsaon pagsinati sila si Phoebe, Borgie ug Jonathan sugod karong adlawa hangtud sa Sabado.:

Banat News Hugyaw (BNH): Unsa na ka kadugay isip host sa MagTV? Giunsa nimo pagkahimong host niini?

Borgie: Nagsugod ko isip host sa MagTV Na niadtong July of 2010 ug ang akong first assignment kay ang coverage sa Panagsogod Festival sa Sogod. Nahimo akong usa ka host tungod sa akong pagsalmot sa 'The Search for the New Kamags" niadtong June of 2010. Gikan sa sobra 60 ka mga auditionees, duha mi nga suwerteng napilian.

BNH: Unsay dili nimo malimtan nga segment nga imong nahimo? Ngano man?

Borgie: Sulod sa dul-an duha ka tuig nako sa MagTV Na, ubay-ubay na sad nga mga kasinatian ang akong mga naagian: kalipay, kasagmuyo, kalisod ug kalampusan. Pero ang pinaka dili jud nako makalimtan nga segment mao ang akong pagsuway isip usa ka kargador og isda sa Pasil. Didto nako nasinati og unsa kalisod ang pagpangita og panginabuhian sa atong mga amigo ug amiga sa Pasil. Gipa-arsa ko og isa ka "bucket" nga isda nga naay gibug-aton nga 50 kilos. Dili lalim! Gipamaulan jud ako tibuok lawas pagkahuman.

BNH: Unsa para nimo ang rason nganong malungtaron ang MagTV?

Borgie: Daghan og rason ngano naglungtad jud ang MagTV Na. Una, tungod sa mga host nga lingaw kaayo tan-awon. Nagkadaiya man ang among mga personalities, pero makita jud sa tanan nga magkasinabot mi. Naa jud mi'y matawag nga chemistry. Ikaduha, tungod sa kakugi sa mga tawo nga nagpaluyo sa show; ang among mga cameramen, audiomen, director ug producers. Makita jud nako og unsa nila gipangga ang MagTV Na pinaagi sa ilang dedikasyon sa trabaho ug respeto sa matag usa. Ikatulo, tungod kay ang tumong sa MagTV Na mao ang pagpakita og unsa kanindot ug kalingaw ang Cebu ug ang tibuok Central Visayas. Tuyo namo ang pagpalambo sa kasayuran sa tanang bisaya pinaagi sa mga segments nga dili lang naghatag og kalingawan, kun di hasta sab inspirasyon.

BNH: Unsay mga kalisdanan nga imong naagian isip host sa MagTV? Giunsa nimo kini pagsagubang?

Borgie: Ang trabaho isip usa ka host sa MagTV Na dili sayon pero ang pinakalisod mao ang unsay mga nahitabo off the camera. Kung daghan mi og mga fans ug mga tao nga dako og respeto sa amoa, daghan pod ang mga tawo nga wala kasabot sa among trabaho. Pirme mi binlan og intriga ug himoan og mga estorya nga makaguba sa among pagkatawo. I deal with the intrigues by finding strength from my family and friends because they are the people who truly know me. I always keep in mind that our job is tough but someone has to do it.

BNH: Unsa pa nga mga segment ang buot nimong buhaton o topic nga buot nimong tukion sa MagTV kun mahatagan og kahigayonan?

Borgie: Hilig ko og music and sports. Gusto unta nako nga makahimo og segment nga nagpakita kun unsa ka talented ang mga bisaya. Nanghinaot ko nga mapalambo pa nato ang atong talento sa music ug sports.

BNH: Ihulagway ang MagTV sa usa lang ka pulong.

Borgie: "Unforgettable!"