Ted Failon sisingilin ang customs commissioner

MANILA, Philippines - Ano na nga ba ang nangyari sa nakatiwangwang na mga kontrabando sa pantalan ng bansa na iniulat ng Failon Ngayon ilang linggo na ang nakakaraan? Babalikan ni Ted Failon ang problemang ito ngayong Sabado (March 31).

 Matapos maisapubliko ang kapabayaan sa mga nakukumpiskang gamit ng Bureau of Customs, humingi ng ayuda ang programa sa kasalukuyang customs commissioner na si Ruffy Biazon para aksyunan ito. Umayos na kaya ang sistema ng pag-iimbak at pagdi-dispose sa mga kontrabando?

Kasabay ng paniningil ni Ted sa ipinangakong reporma ay kukumustahin din nito kung may naitulong nga ba ang paglalabas ng mapa ng Philippine National Police para matukoy kung saan makikita ang mga delikadong vintage bomb na nakadisgrasya ng ilang mga katao noong Enero dahil sa biglaang pagsabog nito.

Bubuweltahan din ng batikang broadcast journalist ang pagpapatupad ng administrative order na nag-uutos na ipasara ang operasyon ng SR Metals Incorporated na nagdudulot ng perwisyo at peligro sa kalusugan sa mga residente ng Tubay, Agusan del Norte dahil sa pagmimina ng nickel sa lugar.

Tunghayan ang buong kuwento bukas sa Failon Ngayon, 4:30 p.m., sa ABS-CBN. Mag-komento at ipahayag ang inyong saloobin sa official page ng programa sa http://www.facebook.com/failon.ngayon at i-follow ito sa Twitter sa http://www.twitter.com/Failon_Ngayon.