Rhian wala malingaw

CEBU, Philippines - Wala kaayo malingaw si Rhian Ramos sa iyang pagbakasyon didto sa Las Vegas gumikan kay naglain ang iyang lawas busa kanunay lang siya nag-istar sa kuwarto sa hotel nga iyang giistaran.

Marian type ni Marlon

Tsika pa sa guwapong racer nga si Marlon Stockinger nga si Marian Rivera maoy iyang gihulagway pinakaguwapa nga artista nga iyang nailhan.

Dapig sa kaugalingong pader

Atol sa Ad Congress, gipangutana ni Korina Sanchez si GMA Network Chairman ug CEO Atty. Felipe L. Gozon kung kinsa gyud ang tinuoray nga nag-una nga TV station sa Pilipinas, mitubag dayon kini og “GMA-7”.

Ming-apil sa isyu sa politika

Giingong dunay mga artista ang nalingaw sa padayag ni Majority Floor Leader Neptali Gonzales II nga ipaputol niya ang liog kung ma-impeach si Presidente Noynoy Aquino.

Genelyn nasayod na daan

Nisamot ang kasuko karon sa mga kabanay nga Revilla ngadto kang Genelyn Magsaysay gumikan kay nasayod na diay kini nga nag-away na daan ang iyang mga anak kaniadto gumikan sa kuwarta.

Martin nagparetoke sa ilong?

Gitsismis si Martin Escudero nga matud pa nagparetoke kini sa iyang ilong apan wala pa’y komento ang aktor kalabot sa maong intriga.

Robin loyal sa Dos

Dili na mabangbang ang pagsalig ni Robin Padilla sa mother network niya nga ABS-CBN busa hanap na ang posibilidad nga mobalhin pa siya og laing network sa higayon nga mahuman na ang iyang kontrata sa Dos.

AJ gipahilak

Gipadayag ni AJ Muhlach nga dunay siya’y crying scene sa seryeng P.S. I Love You sa TV 5 kung diin gikauban niya sa maong eksena si Gabby Concepcion nga maoy mida isip iyang amahan. Masaligon si AJ nga mabaid pag-ayo ang iyang pag-arte sa maong serye ug mao na kini instrumento mosaka pa pag-ayo ang iyang popularidad.

Ynna mitingog na

Wala na makaaguwanta si Ynna Asistio kalabot sa padayong panagbikil karon sa iyang inahan nga si Nadia Montenegro ug sa iyang manager nga si Anabelle Rama nga misangpot na sa panagkihaay. Mensahe pa ni Ynna ngadto kang Anabelle, "Sana pakawalan na niya kami... wala naman pala kaming bilang sa kanya."

Cogie layo sa intriga

Dunay uyab si Cogie Dominggo apan dili kini taga showbiz ug mao kini ang usa sa iyang inspirasyon sa iyang trabaho. Matud pa sa aktor nga layo siya sa intriga busa dakong bentaha alang kaniya nga dili taga showbiz ang nahimo niyang uyab.

Liberacion nakadaug sa N.Y.

Nadasig pa pag-ayo si Jacky Woo nga mobuhat pa og mga pelikula dinhi sa Pilipinas ilabi na nga nakadaug na usab ang pelikula niya nga Liberacion isip Best Narrative sa bag-ohay lang nga New York Manhattan Film Festival niadtong Biyernes.

Joint forces gisugyot

Mitumaw karon ang mga sugyot nga matud pa nga hugyaw ang resulta kung mag-uban sa usa ka pelikula ang mga bida sa Praybeyt Benjamin ug No Other Woman gumikan kay puros kini nagmalampuson sa takilya. Suma pa nga nagsidlak-sidlak gihapon ang popularidad nila ni Vice Ganda, Anne Curtis, Cristine Reyes ug Derek Ramsay busa angayan nga tagaan sila og follow-up project kung diin sila gihapon ang mag-uban.

Richard Marx motikang sa nasud

Motikang dinhi sa Pilipinas ang American pop-rock singer/songwriter nga si Richard Marx alang sa one-night concert sunod bulan. Si Richard maoy nagpasikat sa kanta nga "Endless Summer Nights," "Right Here Waiting" ,"Now and Forever" "Don't Mean Nothing," "Should've Known Better” ug uban pa.

Alex bida sa pelikula

Malipayon si Alex Gonzaga gumikan kay hapit na sugdan ang umaabot niya nga pelikula sa Viva Films. Suma pa niya nga usa kini ka romantic-comedy film apan wala pa siya masayod kung kinsa ang iyang mga makauban niini.

KC nagpadungog-dungog

Nadunggan si KC Concepcion nga milenggua og "To love is sometimes to let go” sa dihang mitambong kini sa party sa Ad Congress sa Camarines Sur. Daghan ang nagduda nga ang iyang uyab nga si Piolo Pascual maoy iyang gipadungog-dungog niini.

Naluwas sa isyu

Gikatahong napugos lang ang pag-angkon nila ni Luis Manzano ug Jennylyn Mercado sa ilang relasyon aron matuldukan na ang mga intriga nga ilang nasugatan. Gumikan sa ilang pag-angkon, nahunong na ang isyu kalabot sa pagka-link kaniadto ni Jennylyn ngadto kang Raymart Santiago.

Venus ug Shamcey nag-uban sa entablado

Ang mga beauty queen nga sila si Venus Raj ug Shamcey Supsup maoy nag-host sa mga games sa Ad Congress. Daghan ang nahugyaw sa duha gumikan kay nagpares gyud sa entablado ang mga lig-on sa natad sa indigay.

Fans ni Mo naguOl

Naguol pag-ayo ang mga viewers sa Paparazzi ug Juicy sa TV 5 sa dihang nadunggan nila ang report nga desidido na gyud si Mo Twister nga adto mopuyo sa Amerika. Suma pa nga sayang kaayo kung biyaan sa TV host ang iyang mga programa sa TV 5.

Mihaom sa uso

Masaligon ang mga bida sa pelikulang Won't Last A Day nga sila si Gerald Anderson ug Sarah Geronimo nga magmalampuson ang ilang pelikula gumikan kay ila kini nga gihaom sa uso karong panahona partikular na ang mga program sa radyo nga mohatag og tambag sa mga love problems sa ilang mga listeners.