Starbox

CEBU, Philippines - Talk show nga walay script nga sundon. Mao ni ang format sa labing bag-ong morning show sa GMA-7, ang “Starbox” nga magsugod na karong Lunes, diin hosts sila si Papa Jack ug Ali Sotto, kauban ang duha sa labing sikat nga miyembro sa XLR8 nga sila si MM ug MJ. Labaw sa tanan, mahimong musalmot sa panag-istorya si bisan kinsa tungod kay manukad kini sa publikong mga dapit—merkado, malls, kadalanan ug uban pa.

Bag-ong Family Feud

Sa pagbalik sa labing malungtaron nga game show sa tibuok kalibutan, ang Family Feud: The Showdown Edition, dili lamang ni bag-o og timeslot, bag-o pud og host ug duna pa gyuy bag-ong segment. Makita na ang Family Feud sugod karong Lunes matag 10:30 sa buntag, kauban ang bag-ong host nga si Edu Manzano, ug dunay bonus segment nga gitawag og, “Sweepheart,” diin ang grupo nga makaharos sa tubag, makaangkon og kahigayonan nga makadawat og dugang premyo.

Ayaw na og intrigaha…

Lihay na gyud si Cristine Reyes dihang nahinabi sa SNN kabahin sa pagpinasayloay na nila ni Sarah Geronimo. Suma pa niya dili na siya gusto ma-interview ug masukit-sukit kabahin niini kay dili siya buot nga ma-showbiz kaayo ang nahitabo. Mas maayo nga magmalipayon na lang ang mga tawo kabahin nilang duha ni Sarah inay bukikion pa gyud ang sinseridad sa maong maayong panghitabo.

Tungod kay anak ni Marcos

Gitaktak sa reality show nga The Renovators didto sa Australia ang anak ni anhing ug kanhi presidente Ferdinand Marcos nga si Analisa Hegyesi, dihang giangkon niya nga anak siya sa giisip nga diktador kaniadto sa Pilipinas. Si Analisa, anak ni kanhi Sydney swimwear ug Playboy model nga si Evelin nga naka relasyon ni Marcos kaniadto, bisan og naminyo na siya ngadto ni karong Representative Imelda Marcos. Nabalaka matud pa ang producers nga matabunan ang ka sikat sa show gumikan sa kontrobersyal nga background ni Analisa. Dismayado si Analisa tungod kay dili basta-basta nga audition ang iyang gisuong, ug gibuhian pa niya ang iyang pagka interior designer tungod lang gyud sa maong show.

Aga gihilakan ni Charo

Nahingpit na gyud ang pagtapon ni Aga Muhlach sa Kapatid Network human siya mipirma og three-year exclusive contract sa TV5 niadtong Miyerkules sa hapon. Tulo ka mga dagkong proyekto ang sunod-sunod nga himuon ni Aga, ang una magsugod karong Hunyo, diin hayan host siya og sikat kaayo nga franchise reality show. Dungan niini, gibutyag ni Aga nga mihilak si ABS-CBN President Charo Santos-Concio dihang iya kining gipahibawo nga mubiya na siya sa Kapamilya Network.

Modernong Lapu-Lapu

Pinaagi sa inyong Banat Hugyaw Spotlight atong ila-ilahon ang 17 ka mga kandidato alang sa “Mr. Lapu-Lapu: a search for a modern-day hero” nga mugna sa inila nga fashion designer/model agent/ show director nga si Dexter Alazas. Samtang ang lente sa Eyeronick Photography ni Ricky Monterona maoy sinaligan pagkuha sa mga hulagway sa gipangita nga labing unang Mr. Lapulapu.

Catch Me, P52 M Na

Mihipos og P52.95 million ang unang lima ka adlaw sa padayon pa karong gisalida nga Star Cinema movie, “Catch Me I’m In Love” starring Sarah Geronimo ug Gerald Anderson.

Kini suma pa sa third party tabulator Box Office Mojo, diin nabutyag pud nga kini maoy labing dako og kita sa tanang pelikula nga mibukas sa milabay nga semana.