Kampo ni Sid written offer ang hinihintay sa GMA 7

Tapos na si Eugene Domingo sa pagpo-promote ng My Valentine Girls na showing pa rin ngayon, kaya sa Who’s That Girl ng Viva Films at SMDC Development na showing naman sa March 2 at sa direction ni Wenn Deramas ang pino-promote niya.

Samantala, ipinaalam ni Eugene sa mga taga-Comedy Bar ng GMA 7 na magho-host siya ng game show sa TV5. Pinayagan naman siya dahil wala siyang exclusive contract sa Channel 7.

Isang big franchise game show from United Kingdom ang game show na every Sunday ang airing, ka-back-to-back ng show ni Joey de Leon sa TV5. 

* * *

Ang mga baguhang sina Jome Silayan na apo ni Vic Silayan at ang Jollibee Big Champ endorser na si Michael Daez ang sinasabing dalawang leading men ni Marian Rivera sa Amaya.

Pero ang sabi, isa lang kina Jome at Michael ang magiging leading man ni Marian dahil ang isang makakapareha nito’y si Sid Lucero. Written offer na lang ang hinihintay ng manager ni Sid na si Ricky Gallardo para pormal nang tanggapin ang alok ng GMA. Tinanong muna ni Ricky ang ABS-CBN kung may project sila for Sid bago makipag-usap sa GMA 7.

Kapag naibigay ang request ni Ricky, malamang nasa storycon si Sid bukas ng Amaya. If ever, ang epic serye lang ang gagawin ni Sid dahil tapos na ito sa shooting ng Prey under Direk Dante Mendoza.

* * *

Wala pang next project sa GMA 7 si Glaiza de Castro, kaya sa indie film muna siya nagpapaka-busy. Tinatapos nito ang L-Bing sa direction ni Rommel Sanchez at ang Patikul sa direction ni Joel Lamangan at makakapareha niya si Marvin Agustin.

Parehong pang-Cinemalaya ang dalawang pelikula, ang L-Bing ay ipapasok sa New Breed category at ang Patikul ay sa main competition.

Kung tinanggap ng kampo ni Glaiza ang offer ng GMA 7 na isang big project, hindi siya maghihintay ng matagal para magkaroon ng bagong show. Maganda ang paliwanag ng kampo nito kung bakit pinalipas ang project at naintindihan sila ng management.