Andrea Del Rosario pang-indie na lang

MANILA, Philippines - Madalang nang makitang nagpapa-seksi ang da­ting Hot Babe na si Andrea Del Rosario. Pero ayon sa kanya, higit na mas liberated ang paki­ram­dam niya ngayon.

Ani Andrea, ang paglabas niya sa mga indie movies ang tunay na nagbibigay sa kaniya ng kalayaan bilang artista. “Sa independent movies kasi mas nabibigyan talaga ng freedom ang mga artista at direktor na i-express ang sarili nila,” paliwanag ni Andrea, na maglalaro kasama ang iba pang suki ng indie movies na sina Anna Capri at Jhong Hilario sa The Singing Bee ngayong Sabado (Oct 10).

Kahit na mas mababa ang kita, nae-enjoy naman daw niya ang mga ginagampanan niyang roles. Hindi na rin daw siya naikakahon sa pagpapaseksi lang. Sa katunayan, isang career-driven reporter ang ginampanan niya sa pinakahuling indie film na ginawa niya.

Sa The Singing Bee, may tsansa ang grupo ni Andrea na manalo ng P 2 milyon. Enero pa nang huling makamit ang jackpot sa hit videoke program ni Cesar Montano. Sila na kaya ang magiging ikalawang team-milyonaryo?

Maki-jam kina Andrea, Anna, at Jhong laban sa iba pang Pinoy pride tulad ng Halili ballet dancers, Philippine All-Stars, RP basketball team, RP ice hockey team at ang defending champions ng programa na comedy bar singers sa ikalimang season ng The Singing Bee ngayong Sabado (Oct 10), pagkatapos ng Tiagong Akyat sa ABS-CBN.