Miss Philippines nagpa-retoke

CEBU, Philippines - Napulo ug lima na lang ka adlaw ang atong paabuton, makoronahan na gyud ang bag-ong labing maanyag nga babaye sa tibuok kalibutan, ang “Miss Universe 2009.” Ang tanang mga kandidata nga magtige sa maong indigay tua na karon sa Bahamas. Ang labing awahing kandidata nga miabot sa Bahamas airport mao si Miss Trinidad and Tobago, Kerry Ann King, ang “finalist” sa Miss Trinidad and Tobago pageant, nga miabot atong usang adlaw alas 6-sa gabii. Siya maoy labing simple ug hilom miabot sa airport.

Ang mga kandidata mo-estar og pipila ka adlaw sa Bahamas gikan sa ilang paghiabot sa lain-laing kanasuran alang sa “registration and fittings” ug pagpa-picture para sa website. Gani nagsugod na sila sa ilang aktibidades sama sa pagsuroy-suroy ngadto sa Ardastra Gardens, Clifton Heritage Park, National Art Gallery ug sa Fort Charlotte, ang labing dako nga “fort” sa Nassau, Bahamas para sa ilang “photo op” ug swimsuit pictorials. Si Miss Universe 2008 Dayana Mendoza miabot atong Miyerkules kauban sa ubay-ubay’ng mga kandidata.

Ang pambato sa Pilipinas nga si Miss Philippines 2009 Pamela Bianca Manalo miabot atong Martes sa gabii. Siya mapagarbohong gi-”welcome” ug misinggit og “Mabuhay” gikan sa atong mga kababayan nga nagpuyo ug nagtrabaho sa Bahamas sa iyang pag-abot sa Atlantic Paradise Island resort. Bisan gikapoy si Bianca sa pagbiyahe lapas sa 24 oras, siya nalipay ug wala magdahom sa suporta nga gihatag sa mga Filipinos didto nga nag-presentar sa mga organisasyon nga nagpuyo sa Bahamas.

Si Bianca nagkanayon nga iya nang napanglantawan ang umaabot nga mga “experiences” nga iyang mahiagoman ug makighugoy-hugoy sa lain-laing mga kandidata. Gani pirmero sad siya nga mi-biyahe nga nag-inusara ug nalipay pud siya nga nag-tan-aw sa mga Filipinos didto nga miwarawara sa ilang mga Philippine flags.

Nasayran nga nangandam gayud si Bianca alang sa maong indigay, gani sa iyang pag-agi sa Bogota, Colombia, mipailawom na siya og medical procedure diin dunay gi-inject sa iyang tiyan nga medisina aron maoy mutunaw sa fats. Four pounds ang naiban sa abs ni Bianca hinungdan nga firm and fab na kining tan-awon.

Ang mga “beauty experts” nga misaksi, nag-obserbar ug nag-cover sa paghiabot sa mga kandidata sa Bahamas sama nilang Ines Igron, Michelle Malcolms ug uban pa nagkanayon nga ubay-ubay gyud  mga kandidata nga mga “stunners”, ug “exotic beauties” sama nilang Miss Dominican Republic, Miss Puerto Rico, Miss Thailand, Miss Jamaica, Miss Philippines, Miss France, Miss Russia, Miss USA, Miss Kosovo, Miss Australia, Miss Mexico, Miss South Africa, Miss Belgium, Miss Iceland ug Miss Venezuela. Si Miss Great Britain 2009, Clar Cooper nangomedya sa gipahigayong interview ngadto sa “media” ug miyembro sa “press” nga ganahan daw siya pirme moadto sa Bahamas sa umaabot niyang “honeymoon” kung mag-minyo siya ug makiglangoy kauban ang mga “dolphins”.

Ang Miss Universe Organization pormal na gyud nga mi-anunsiyo nga 15-semi finalists sa 84 ka mga kandidata ang pilion para mo-”compete” sa “Swimsuit”, Top 10 para sa “Evening gown” ug Top 5 para sa “Interview”, dayon koronahan ang labing guwapa nga babaye.