OKRYAN! BIGGER AND STRONGER@3

Hugyawnatics three years old na ta karong adlawa! Congratulations natong tanan—sa staffers sa Hugyaw sa Banat News, (writers, layout artists, proofreaders ug uban pang production support crew), mga local talents nga mipaambit sa ilang mga istorya diha sa mga artikulo ug labaw sa tanan kamo hugyawnatics nga walay puas ang pagbubo sa inyong suporta pinaagi sa pagbasa ug pagpadangat sa inyong mga reaksyon matag karon ug unya. After all, this is your Hugyaw—this is our Hugyaw!

Busa kung nagmalampuson kita sa atong mga tinguha, among mga panikaysikay aron mulambo ang Hugyaw, dako kamong kabahin niana our dear hugyawnatics. Among kinasingkasing nga pasalamat tungod sa inyong pagpaluyo ug pagsanong sa panawagan nga makamugna kita og atong kaugalingong entertainment section nga dili lamang kutob sa pagpasiatab sa mga panghitabo sa kaulohan, kundili—ug importante sa tanan, ang makahatag og kahigayonan sa atong kaugalingong lokal nga talento nga mailhan, mas mailhan ug mapaila ngadto sa mabinantayon nga publiko.

Sulod sa tuig 2008 inyong nahibalag dinhi sa mga pahina sa Hugyaw ang nagkadaiyang mga mananaug sa indigay sa kaanyag ug kaambong gikan sa mga kalungsuran ug dakbayan, dili lamang dinhi sa Sugbo kundili hasta na sa sikbit nga mga lalawigan sama sa Leyte (Ormoc City) ug Negros Occidental ug Oriental (San Carlos City ug Hari ng Negros). Gikagubtan pod ug nakakuha og iyang kaugalingong tigpaluyo ang atong mga blind items kabahin sa mga “pasaway” ninyong mga local celebrities. Gisuwayan nato og paambit ang fashion updates para sa masa nga publiko nga nakakuha og ubay-ubay nga suporta, apan sa kinatibuk-an atong nasuta nga dili pa kita andam alang sa maong kalambuan. Wala namo ikasubo among mga kahugyawnatics ang wala ninyo paghangop, hinunua dako namong kalipay ang inyong pagpakita og pagsupak sanglit nagpasabot lamang kini nga duna moy pagbati ug pagpakabana sa imo ug atong Hugyaw. Sa mga nakauyon sa maong mugna, paabota ang pagbalik niini. Sa mga wala makauyon, ayaw kabalaka kay atong paningkamutan nga inyo nang ikahimuot ang maong pagbalik.

Sa naghinapos nga bahin sa milabay nga tuig, atong gibuksan ang inyong Hugyaw alang sa nagkadaiyang dance groups nga mamantala ang ilang mga nakab-ot nga pasidungog ug nahuptan nga kadaugan. Magpadayon ang mao natong kawsa aron mas maila pa ang Sugbo dili lamang isip panimalay sa mga banggiitang mang-aawit kundili isip dapit sa mga hugyaw nga mananayaw.

Mapasalamaton pud kita nga gumikan sa tabang sa pipila ka kasaligang mga binuhat atong nahatod gilayon diha kaninyo ang mga detalye sa mga pagpanimpad ug kadaugan sa atong mga pambato sama nila ni Miss Earth Karla Paula Henry, PDA scholars Van Roxas ug Apple Abarquez, Mutya ng Pilipinas Turismo Jam Charish Libatog ug hasta na ang istorya ni Cebu based model ug Mutya ng Pilipinas 2nd runner-up Queency Bernalez. Paspas usab nato nga nahatod diha kaninyo among mga hugyawnatics ang istorya nila ni Survivor Philippines castaways Patani Dano ug Vevherly Gador.

Sa 2008 mas milig-on ang pwersa sa Hugyaw sa pagsulod nila ni Bonding Adrian Diongzon ug correspondent Sanden Anadia. Ang ilang mga talento nga nakigtambayayong sa katakus sa atong regular columnists—Kriss Relatado, DJ Ram, BisChikador Yuri, Pinay Mangatkatay Eleanor Elape Valeros ug OkRyan—ingon man ni regular writer Marigold Lebumfacil ug Brenda Batuto nakapahugyaw og samot sa atong mabungahon ug mabulukong panag-uban. Tungod sa atong kugihan ug maabtik nga mga kaubanan, nagkadako ug nagkalig-on ang inyong Hugyaw. Better and Bigger, that’s what we are our dear hugyawnatics!

Of course mapasalamaton kami og dako ngadto sa among “tatay” nga si sir Jabs Jabat tungod sa walay puas nga suporta, ilabi na sa pagpadangat sa tinuod nga pulso sa bagang duot nga publiko. Dako usab namong kalipay nga mismo ang presidente sa Star Group of Publications, Miguel Belmonte nag-monitor sa among kalihukan ug mopasupot sa iyang mga bulawanong hunahuna aron mas mo-hugyaw pa ang atong Hugyaw, sa among general manager nga si sir Bhoy Mendoza nga kanunay nga anaa aron maminaw sa among mga yangongo ug motapik sa among abaga panahon sa kalampusan, ang among managing editor nga si Johnrey Saavedra nga kanunay’ng masinabtanon ug sa tibuok Banat News family nga kanunay andam ug tagana.

Karon kay Bag-ong Tuig man, duna puy duha ka mga bag-ong paukyab ang inyong paborito nga Hugyaw. Una mao ang bag-o natong section masthead nga inyong nakita sa taas nga bahin, diin ato na gyud nga gihatagan og igong pagtagad ang homegrown talents. Sa atong paningkamot nga mahukad diha ninyo ang istoryang lokal kutob sa among maabot, hayan dili hinambog kun mangangkon mi nga ang inyong Hugyaw maoy pinuy-anan sa mga lumad nga mga talento diin ang ilang bidlisiw mas gipasidlak. Ikaduha nga mugna nga atong paambitan karong 2009 mao ang pagkahimugso sa bag-o ninyong atangan, ang Mouths Unsealed..where candidness comes out! Unsa kining maong mugna? Paabot lang mga hinigugma namong hugyawnatics kay hasta mi naghinamhinam na unsay mamahimong bunga niining maong bag-ong putahe. Hapit na gyud as in!

Among gi-ampo ug gipanghinaot minahal namong hugyawnatics nga sa tuig 2009 pabilin gihapon ninyo nga ibubo ang inyong mainiton nga suporta alang sa paglambo pa sa imo ug atong Hugyaw. Happy New Year hugyawnatics! Happy birthday to all of us! Mhwaaaaah…