The Buzz gisermonan ni Alfie

Nagdumili si Alfie Lorenzo nga mahinabi sa crew sa The Buzz niadtong Miyerkules sa hapon kalabot sa nawala niya nga salapi ug kabutangan human nalungkab ang iyang balay. Pero ang tsika mao nga gisermonan ni Alfie ang crew tungod kay wala pa kini makalimot sa matud pa niini gitagud-tagud nga interview niya sa The Buzz kaniadto atol sa intriga tali ni Judy Ann Santos ug Claudine Barreto. Matud ni Alfie gi-edit-edit ang iyang taas kaayo nga pagpasabot diin ang gipagawas ra mao nga naglagot siya ni Claudine bisan og ang tinuod wala siyay kasuko sa aktres. Pero matud pa nga bisan og mibalibad na siya sanglit nagpa-interview naman siya sa Showbiz Central, namugos matod pa ang mga taga The Buzz, ug gani padayon kini sa pagkuha og footage niya nga nagyawyaw. Hugtanon kining gihimakak sa The Buzz tungod kay matod pa ang camera nga nag-atubang kang Alfie dili na ilaha kundili sa ubang TV networks na.