Rap & Dance Contest

Mag-abot ugma sa  gabii ang unom ka dance group ug rappers diha sa Mabolo Elementary School Gym alang sa grandfinals sa labing unang Inter Barangay Summer Rap and Dance Show nga pasiugdahan sa Ginebra San Miguel Inc. (GSMI Production) ug Brownian Movement. Tumong niining maong tigi mao ang pagkaplag sa abilidad sa mga batan-on diha sa pag-rap ug pagsayaw isip paagi aron mahilayo sila sa ginadiling droga ug kriminalidad.

Si M.C Rey sa Brownian Movement, miila sa unom ka mga rappers nga sila si RC15 sa Mabolo, Creepy bone sa Sambag 2, Fat ken  sa Mambaling, Uno punto sa Apas, Butch sa Basak Pardo ug Bunot sa Banilad.  Ang bulahang mananaug nga rapper makadawat og P5, 000 cash, gift pack ug recording contract ubos sa GSMI samtang  ang modaog nga dance group dunay P10,000 cash.

Motekang sa maong kalihukan ang giila karon nga “Kylie Minogue of the Philippines” Nancy Jane, Ginebra Models, The Crazy Acrobat Dancers ug ang Brownian Movement isip main performer.  

“Search For  Singing Stars”

Nagpadayon ang bangga sa awit diha sa lungsod sa Compostela, ang Search For Singing Stars nga gilangkuban og duha ka kategoriya—Little ug Big Division. Gitumong kini aron paghatag og kalingawan sa tanan, ilabi na nga nagsingabot ang kapistahan sa maong lungsod nga mahitabo karong Hulyo 16 ngadto sa 25, pasidungog sa patron, Senyor Santiago Apostol. Ang Search For Singing Stars makita sa linawas diha sa Compostela Municipal Plaza matag alas 7:30 sa gabii kada Sabado. Ang hinashasay, mahitabo matag alas 9 a.m. hangtod 12 noon sa buhatan ni Mayor Ritchie R. Wagas, matag Sabado usab.

Alang sa dugang kasayuran, tawag sa 09265987913.

“A Night With Sibonga Talents”

Gipahigayon niadtong Mayo 24, ang A Night With Sibonga Talents diha sa lungsod sa Sibonga, tungod sa tumong ni Mayor Leonel Bacaltos pagkaplag sa tinaguang talento sa mga Sibonganhon diha sa sayaw, arte, awit ug daghan pa.

Karong umaabot Hunyo 9, nga maoy fiesta sa maong lungsod, idalit usab ni Bacaltos ngadto sa tanan ang usa ka pasundayag diin ang main attraction mao ang novelty legend nga si Max Surban. Masaksihan usab diha sa maong lungsod ang Asia’s Diva nga si Dulce alang sa usa ka concert sa dili pa ang tinuig nga Bonga Festival.

Nasayran nga ang “bonga,” naggikan sa usa ka matang sa palm tree diin makuha ang maskada kon tilad nga usapon sa mga katiguwangan nga isagol sa tabako. Giingon nga ang tilad kon maskada makapalig-on sa lagos ug ngipon.

Kitchie for Caltex

Gilusad sa Chevron, ang tiggama sa engine-cleaning fuel brand Caltex with Techron, ang labing bag-o nila nga television commercial featuring singer/songwriter Kitchie Nadal. Sa maong TVC gipakita ang ka importante sa pagmentina sa kalimpyo sa makina sa sakyanan alang sa mas hamugaway nga byahe.

Ang maong pahinumdom nga molungtad og 30-seconds usa ka global campaign nga isalida sa pito ka mga nasud sa Asya, lakip na ang Pilipinas. Kini maoy unang higayon usab nga mo-endorso si Kitchie og produkto nga global ang pagpagya. Siya maoy labing unang singer/ songwriter sa nasud nga milugwa alang sa usa ka regional ad campaign sa Caltext with Techron.

“We chose Kitchie because she reflects the positive qualities of our products. As we do with our car’s engine, Kitchie has to keep her musical instruments clean so she can always deliver top-quality performances to her audience,” pasabot ni  Caltex Brand Manager Enrico de Leon.