Call of Guadalupe, ugma na gyod

Ayaw gyod mo’g kalimot, mga Yadzz, nga ugma, sa gabii, diha sa SM Cinema 1 dunay nindot kaayong pasundayag nga usa ka mabulokon kaayong musical play, nga kinahanglang inyo gyong tan-awon, dili lang tungod kay nakaila mo nilang Chai Fonacier ug Joe Galeon nga may mahinungdanon kaayong papel sa naasoy nga musical play, kun dili, may mahinungdanon kaayong pagtulon-an ang maong pasundayag, labi na karong panahona.

Dili ba, hapit kada adlaw, duna tay mabasahan sa mga pamantalaan nga dunay mga fetus nga ibilin kun dili sa simbahan, sa mga mall? Di pa lang dugay, adtong miaging Martes, Pebrero 26, nabasahan nato sa page 4 sa Banat News nga sinuwat ni Rey Pasaporte, nga may gibiyaan na sad sa kalibunan sa inahan nga usa ka puya? Maayo man gani kay nabuhi ang bata. Pero ang pangutana, mabunyagan ba dayon ang bata sa dili pa mamatay? Abortion baya gyo’y itawag ana? Unya, kun mamatay ang bata? Asa man paingon ang bata, nga nasayod na man ta nga kun mamatay ang usa ka tawo nga way bunyag, dili man malangit? Dili raba gyod na sala sa bata kun namatay siyang wa kabunyagi, pero siya’y mag-antos. 

Mao kana nga tan-aw gyod mo sa musical play na nag-ulohan og “Call of Guadalupe” kay abortion ang topic niini. Ang bana, gikatakda nga ma-promote, ubos sa kondisyon nga dili una magmabdos ang asawa. Pero, kay mabdos man ang asawa, kinahanglang ipakuha, aron magpabilin siyang matawag nga “ultimate socialite.” Gipapili silang magtiayon—ipakuha ang bata aron ma-promote ang amahan sa bata ug magpabilin silang halangdon sa mga mata sa maot nga hut-ong sa katilingban, or ipadayon ang pagpadako sa bata sa sabakan sa inahan, pero dili sad ma-promote ang amahan. Mga Yadzz, kamo’y magpili unsay inyo, basta ang maong musical play, sugdan sa pagpasundayag ugma, sa sunod ugma, ug sa sunod ugma. So, wa mo’y katarungang moingon nga wa gyod mo’y panahon.