Joross,magpasexy pud

“Hindi, maliit eh,” tubag ni Star Magic talent Joross Gamboa dihang gipangutana sa E-Group (entertainment group), kalabot sa sexy nga mga hulagway niya nga mikatap sa Internet pipila ka buwan na ang milabay.

Si Joross, kansang teleserye “Natutulog Ba Ang Diyos?” natapos na niadtong Biyernes, dinhi sa Sugbu niadtong Sabado, Oktubre 6 isip celebrity guest sa Gaisano Main Incorporated. Kauban ang laing Star Magic talent nga si Valeen Montenegro, makabungog ang syagit nga nadawat ni Joross dihang mitekang sa entablado sa Balamban Sports Complex aron paglingaw sa mga suki sa Gaisano Balamban nga walay puas nga nagsuporta sa maong tindahan diha sa maong lungsod. Tinuig kini nga “halad” sa Gaisano Incorporated nga ipahigayon matag liwas sa piyesta sa maong lungsod. Pagkagabii niadtong Sabado, mitekang usab sila si Joross ug Valeen sa Gaisano Countrymall nga nagsaulog sa ika-14 nga anibersaryo karong buwana, alang sa usa ka mini-show diin gikagubtan usab sila og maayo sa ilang mga sumusunod.

Una niini, atol sa paniudto diha sa Lighthouse Restaurant Mango Avenue, nahinabi makadiyot si Joross sa pipila ka sakop sa E-Group ug usa sa nahisgutan mao ang sexy pictures sa Internet. Human sa iyang komedya nga dili siya kay “maliit” ra ang misihag nga “asset” diha sa maroon nga boxer shorts, miseryoso siya pag-ingon nga kun tarungon gyud og tan-aw ang maong mga hulagway tataw nga gimaniobra o photoshopped lamang ang tanan. Matud niya, wala siya’y ingon niadto nga mga hulagway ug wala usab siya makakita og rason nganong mag-ingon niadto siya, kun siya man gani kadto.

Pero iyang gitataw nga bukas siya sa sexy roles apan dili pa una karon. “Halos lahat naghuhubad eh, ayaw kong makisabay. Pero bukas ako sa mga ganu’n. Siguro mas okay sa film kesa pictures,” nagkanayon siya. Matud ni Joross, kinahanglan pa pud niya panindoton ang iyang lawas aron dili siya mauwawan.

Sanglit natapos na ang “Natutulog Ba Ang Diyos?”, miingon si Joross nga duna na siya’y follow-up project nga teleserye gihapon apan nagdumili siya pagbutyag unsa kini sa kabalaka nga dili na hinuon mahinayon. Basta matud pa niya, nindot ang naka-line niya nga projects sa ABS-CBN, kun matinuod man.