Bagong pasisikatin ng Viva

Ang saya-saya naman ng Viva Records dahil meron na naman silang bagong na-discover na mahusay na singer sa katatapos na Search For A Star last Saturday.

Maswerte sa gabing iyon ay walang iba kundi si Rachelle Ann Go. Imagine sa edad na 17 years old, milyonaryo na agad ang bagets at may instant house and lot pa siya! Bukod dito, meron pa siyang contract sa Viva Artists Agency. Sa pagpatnubay ng Viva, nasa mabuti siyang kamay. Kung paano naging madaling masungkit ni Sarah Geronimo ang tagumpay sa paggabay ni Boss Vic, hindi malayong ganito rin ang maging kapalaran ni Rachelle. Kung iba ngang finalists lang ng Search For A Star last year ay hindi pinabayaan ng Viva, si Rachelle pa na tinanghal na winner ngayong taon ang hindi asikasuhin ng Viva? Pero mapantayan o malampasan kaya ni Rachelle ang kasikatan at tagumpay ni Sarah sa hinaharap? Hintayin na lang natin.

Katulad last year, dinumog pa rin ng mga fans ang Ultra at lahat ay nagtiyagang hinintay ang paghirang ng winner kahit lampas alas-dose na ng gabi. Lahat naman ay sumang-ayon sa pag-declare sa pagkapanalo ni Rachelle Ann Go sa winning peace niyang "Through The Rain".

Maganda rin yung duet nila Regine Velasque at Sarah Geronimo. Inspiring din yung mala-beauty pageant na pagsasalin ni Sarah ng kanyang trono bilang champion ng Search For Star 2004.

"Napaka-memorable po kasi sa akin ng Star For A Night Parang nag-flash back po sa akin ang lahat ng nangyari. Kaya sobra-sobra po ang pasasalamat ko kina Ms. Regine at sa Viva family lalo na kina Boss Vic. Salamat po, salamat," maiyak-iyak na sabi ni Sarah.

Ano ang masasabi niya kay Rachelle na bagong winner ng SFAS? tanong ko kay Sarah.

"Ang galing-galing po nilang lahat lalo na si Rachelle," comment ni Sarah.

* * *

Ilang araw nang super busy sina Sheryn Regis at Erik Santos sa pag-aasikaso ng kani-kanilang album under Star Records. Plano kasing sabay na i-release ng Star Records ang kanilang album.

Tinanong ko si Sheryn kung okey na sila ni Erik dahil noong makausap ko siya after ng Star In A Million ay masama pa ang loob niya sa nangyari.

"Okey na po kami. Wala naman po kaming friction kahit noon pa. Akala lang ng tao yun dahil siguro nakita nilang nalungkot ako, pero wala na po iyon. Initial reaction ko lang po iyon," confirmed ni Sheryn.

Ngayon ay nasa finishing touches na ang album ni Sheryn at kahapon ay nag-pictorial na siya para rito.