Editoryal — Kriminal magpailang otoridad, kakuyaw

Ang mga kriminal ug uban pang mga dautang elemento mangita gyud og pamaagi aron makabiktima, bahala pa og unsa nang gipanghimong pang-alkontra o estratehiya sa kapolisan pagpakgang sa krimen.

Una sa tanan, daghan klase ang krimen gikan sa krimen pagpasipala og tawo sama sa pagpatay ug krimeng ang tuyo kabtangan sa tawo. Duna say mga krimen nga gidili ubos sa mga espesyal nga mga balaod sama sa ilegal nga drugas ug uban pa.

Sa kadaghan sa bantayanan sa kapolisan, dili na maato tanan og monitor. Pun-an pa nga dunay mga tawo o bisan mga establisamento nga grabe ra sab ka kumpiyansa sa ilang seguridad, maglisod gyud ang kapolisan pagmentinar nga wala gyuy krimeng mahitabo.

Tungod sab aning mga sagunson nga mga krimen, ang mga tawo malipay nalang o bation og seguridad ini og makakita og mga otoridad nga naghimo sa ilang trabaho.

Kay lagi ang ilang presensiya diha palang sa kadalanan makapahadlok naman sa mga kriminal nga maghimo og mga krimen.

Samot ng ikahimuot sa publiko kun aktwal gyud nga makita ang mga otoridad nga niusig o nanakop og mga tawong sad-an o dunay gihimong salaod.

Apan unsaon nalang kun kani nga “sense of security” sa publiko, maoy gamiton sa mga kriminal aron walay mosanta o mopakgang sa ilang himuong krimen?

Sama sa nahitabo sa pagtulis sa Oro Sugbu nga diin ang usa sa mga tulisan nagpailang ahente sa National Bureau of Investigation. Kinsa mang yanong tawo ang mobadlong anang “taga NBI” nga naghimo sa ilang trabaho?

Makadaghan na nga dunay dagkong krimeng nahitabo nga ang mga kriminal magpakaaron-ingnong mga otoridad. Kumon kaayo kini sa kampanya kontra ilegal nga drugas, dunay mga kriminal nga magpakaaron-ingnong otoridad aron mangilngilkil, manulis, o mopatay.

Mao kini ang makahadlok, dili na mahibaw-an kun kinsa ang tinuod nga otoridad ug kun kinsa kadtong magpakaaron-ingnon lang.

Apan sagad mahitabo lang kini kun ang lugar nga diin himuon ang krimen walay tinuod nga otoridad nga nagbantay.

Sama sa nahitano sa Oro Sugbu sa dalan Colon, kun duna pay polis sa lugar anang tungora, modayon kaha og panulis ang mga tulisan?