Basura

Basura ang isang problema ng bansa

na hindi malutas ng gobyernong madla;

kung problemang ito’y agad mawawala

malulunasan na ang mga pagbaha!

Dahil sa basura ang estero’t kanal

mabaho ang tubig pagpatak ng ulan;

at dahil ang baha ay walang takbuhan

pati mga kalye’y nagiging dagatan!

at sa mga lugar na lubhang mababa

ang taas ng tubig ay nakakalula;

mayroong hanggang baywang-hanggang leeg pa nga

mga tao’t hayop ay walang magawa!

Kung ang basura lang ay maitatapon

sa lugar na tama at hindi sa bunton

ng mga basurang mabaho sa ngayon

tiyak tayong lahat ay ligtas maghapon!