Nasudnong kagamhanan manghatag og school supplies

CEBU, Philippines — Ang nasudnong kagamhanan opisyal nga nilusad sa programang “Bagong Bag para sa Mag-aaral: Presidential Assistance to Primary-Grade Learners” nga nagtumong sa paghatag og mga suplay sa pag-eskwela alang sa duha ka milyon nga estudyante gikan kindergarten hangtud sa grade 3 sa tibuok nasud sulod sa school year.

Ang programa nga gilusad niadtong Hunyo 9, 2026 subay sa direktiba ni Presidente Ferdinand Marcos, Jr. nga masiguro nga ang mga bata andam pagsugod sa klase samtang mapagaan ang pinansiyal nga palas-anon sa mga pamilya sa mga Pilipino ilabina sa gasto sa back-to-school.

“We know that for many families, preparing for the school year means making sacrifices to buy school supplies and other needs. By helping the hardworking parents get their children ready for class, we are giving our kids a better start”, matud ni Executive Secretary Ralph Recto sa gipadala nga mensahe.

Si Recto nagkanayon nga ang inisyatibo dili lang limitado sa paghatag og mga gamit sa eskwela nipasalig usab ang administrasyon nga walay Pilipinong bata ang mabiyaan tungod sa kakulang sa batakang kahibalo ug kahimanan sa pagkat-on.

Ang matag benepisyaryo gihatagan og pre-packed nga bag sa eskwela nga adunay mga notebook, lapis, krayola, ruler, eraser, sharpener ug uban pa’ng kinahanglanon sa pagkat-on.

Ang maong programa gipatuman pinaagi sa Socio-Civic Projects Fund sa Office of the Executive Secretary kauban ang Department of Education aron masiguro ang hapsay, tukmang oras ug target nga paghatag sa tabang ngadto sa mga piniling benepisyaryo sa tibuok nasud. — /BDB (BANAT NEWS)