Lider ng gun-for-hire, todas sa shootout!
Utak sa pagpatay sa 2 tao sa Calbayog
MANILA, Philippines — Patay ang kilabot na lider ng “gun-for-hire group” habang dalawa nitong kasamahan ang nadakip sa naganap na pagsalakay ng mga awtoridad na nauwi sa engkuwentro sa Brgy. Hamurawon, Calbayog City, Samar nitong Miyerkules.
Sa inisyal na report ng pulisya, magsisilbi sana ng warrant of arrest ang mga operatiba ng Regional Intelligence Unit ng Police Regional Office 8 sa dalawang kasong murder laban sa suspek na si Carlito Magbutay alyas “Alas” nang kumasa sa mga alagad ng batas.
Pinaputukan agad umano ng suspek ang mga operatiba na papalapit sa kanyang tinutulayang bahay na naging dahilan ng engkuwentro.
Bulagta si Alas at nasamsam sa tabi ng bangkay nito ang AK47 na baril na may tatlong magazine at 84 na bala.
Arestado naman ang dalawang kasamahan ni Alas na kinilalang sina Ricky Medrano Casaljay at Reymart Rosini, na nakuhanan ng kalibre 45 na baril na may aabot sa 50 na bala.
Nakuha rin sa mga suspek ang fatigue uniform, bota at mga duyan na ginagamit umano nila sa kanilang illegal na aktibidad.
Lumalabas na ang grupo ni Alas ang itinuturong responsable sa pamamaril sa Brgy. Victory noong Abril 14 na ikinasawi ng dalawang tao kasama ang isang menor-de-edad.
- Latest
