Mag-asawa utas, tserman grabe sa ambush
Patay ang isang mag-asawa habang malub-hang nasugatan ang isang brgy. chairman sa magkahiwalay na insidente ng pananambang sa Northern Samar kamakalawa ng gabi.
Sa ulat ni Police Regional Office (PRO) 8 Director Police Brig. Gen. Dionardo Carlos, bandang alas -8:15 ng gabi nang tambangan ang mag-asawang sina Ailyn Arandia, negosyante at mister nitong si Chiquito Arandia, ingat-yaman ng Brgy. Gecboan, sa Brgy. Poblacion III, Silvino Lobos ng lalawigan.
Si Ailyn ay dead-on-the-spot sa tinamong mga tama ng bala sa iba’t ibang bahagi ng kanyang katawan habang idineklara namang dead-on-arrival sa Northern Samar Provincial Hospital sa Catarman ang mister nito.
Base sa imbestigasyon, bigla na lamang sumulpot sa lugar ang mga armadong salarin na agad niratrat ang mga biktima saka mabilis na tumakas.
Sa isa pang insidente, dakong alas-8:50 ng gabi nang pagbabarilin ng mga armadong lalaki si Joseph Pahimnayan, 49, chairman sa Brgy. Gebunawan, Lope de Vega ng lalawigan. Siya ay nagtamo ng dalawang tama ng bala sa ulo kung saan nasa kritikal itong kondisyon sa Catarman Doctors Hospital.
- Latest